Oxumaq insanın düşüncə dünyasını genişləndirən, ruhuna sakitlik bəxş edən ən gözəl vərdişlərdən biridir. Kitablar bəşər mədəniyyətinin xəzinəsidir və onları sevən insanlar cəmiyyətin gələcəyini formalaşdırır. Bir gün iki dostum qonaq kimi evimizə gəldi. Həyətdə çay süfrəsi arxasında söhbət edərkən onların düşüncələri və məqsədləri məni dərin fikirlərə saldı.
Dostlarım həyətə daxil olan kimi gül-çiçəklərin gözəlliyi, ağacların yaşıllığı və təbiətin təravəti onlarda heyranlıq yaratdı. Bir qədər sonra söhbət kitab mövzusuna yönəldi. Onlar mənə bildirdilər ki, şəhərdə qalaraq bir aylıq layihə həyata keçirəcəklər. Layihənin məqsədi uşaqlara, şagirdlərə və ümumiyyətlə insanlara kitabı sevdirmək idi.
Təşəbbüs çox maraqlı idi: məktəblərə müxtəlif kitablar paylanacaq, şagirdlərdən bu kitabların məzmununu öyrənmələri istəniləcəkdi. Təxminən 15–20 gün sonra həmin şagirdlər arasında imtahan keçiriləcək, yüksək nəticə göstərənlər isə pul mükafatları və hədiyyələrlə təltif olunacaqdı.
Bundan əlavə, sərgiyə marağı artırmaq üçün “Mənim kitab daxılım” adlı kiçik bir qutu hazırlanmışdı. Uşaqlar bu qutuya hər gün az miqdarda pul yığacaq, kitab sərgisi zamanı isə topladıqları vəsaitlə istədikləri kitabı alacaqdılar. Beləliklə, həm kitab sevgisi formalaşacaq, həm də toplanan vəsait yenidən uşaqların təhsili və kitab təminatı üçün istifadə olunacaqdı.
Bu fikri eşidəndə çox sevindim. Həqiqətən də, kitab sevgisini yaymaq üçün çalışan insanların varlığı dəyərlidir. Kitab oxumaq insanı təkcə maarifləndirmir, həm də onun ruhunu zənginləşdirir, düşüncəsini formalaşdırır. Hər bir kitab bir həyat, bir hekayə, bir dünya deməkdir.
Elektron cihazların və sosial şəbəkələrin sürətlə yayıldığı dövrdə bəzən onlardan uzaqlaşıb əlimizə kitab almaq, səhifələrin qoxusunu hiss etmək və yazıçıların qəlbindən süzülən fikirləri oxumaq lazımdır. Çünki hər bir yazıçı öz əsərinə hisslərini, sevgisini və təcrübəsini qatır. Biz oxuduqca həmin duyğular bizə də keçir, həyat baxışımız dəyişir, dünyagörüşümüz genişlənir.
Kitablar bizim ən sadiq dostlarımızdır. Onları qorumaq, sevmək və başqalarına sevdirmək hər birimizin borcudur. Cəmiyyətin savadlı, düşünən və yaradıcı olması üçün kitab oxumaq əsas şərtdir.
Gəlin kitabı həyatımızın bir parçasına çevirək, oxuyaq, öyrənək və bu sevgini ətrafımızdakılara da ötürək. Çünki kitab oxuyan millət – düşünən və gələcəyə inamla baxan millətdir.
Elçin Ağasıyev
Paraqraf.com
