Gün ərzində yuxulu hiss etməyimiz bəzən gecə necə yatmağımızla bağlı olmur. Əslində, qəbul etdiyiniz qidalar da bu vəziyyətdə mühüm rol oynayır. Qidalar yalnız enerji mənbəyi deyil, həm də fəaliyyət və məhsuldarlığın əsas tənzimləyicisidir. Rafinə karbohidratlarla zəngin qidalanma rejimi qan şəkərini sürətlə qaldırıb endirərək sizi halsız və yorğun sala bilər. Dəmir və vitamin çatışmazlığı olan bir pəhriz isə bədəndə oksigen dövranını azaldaraq yorğunluğa səbəb ola bilər.
Paraqraf.com Qaynarinfo-ya istinadən xəbər verir ki, gün ərzində yorğunluğunuzu aradan qaldıran, vitamin və qida balansınızı qoruyan qidaların siyahısını təqdim edir:
İspanaq
Orqanizmdə dəmir çatışmazlığı yorğunluq və yuxululuğun ən yayılmış səbəblərindəndir və qanazlığına gətirib çıxara bilər. Bu çatışmazlığı aradan qaldırmaq üçün ən yaxşı qidalardan biri ispanaqdır. Çox vaxt “super tərəvəz” adlandırılan ispanaq həm dəmir, həm də maqnezium baxımından zəngindir. İspanağı rasionunuza daxil etmək sizi bir anda gücləndirməsə də, salatlara, şorbalara və ya omletlərə əlavə etmək gün ərzində yuxululuğu azalda bilər.
Mərcimək
Fol turşusu (B9 vitamini) çatışmazlığı da yorğunluğa səbəb olur və bu problemi aradan qaldırmaqda mərcimək kömək edə bilər. Mərcimək fol turşusu ilə zəngin olan ən yaxşı qidalardan biridir. Zülalla da zəngin olan bu xırda dənələr həm ucuz, həm də asan əldə ediləndir. Yeməklərə və salatlara mərcimək əlavə etmək, həmçinin qovrulmuş şəkildə qəlyanaltı kimi yemək enerjini artırmağı yaxşı üsuludur.
Balqabaq tumu
Balqabaq tumu kiçik olsa da, çox faydalıdır. Bu tumlar maqnezium, sink və sağlam yağlarla zəngindir. Sink immun sisteminin fəaliyyətini gücləndirir, maqnezium isə yorğunluq və stressin azaldılmasında mühüm rol oynayır. Elmi tədqiqatlar maqneziumun yuxu keyfiyyətini yaxşılaşdırdığını göstərir.Bir ovuc qovrulmuş balqabaq tumunu qəlyanaltıda yemək və ya qatıq, yulaf və saatların üzərinə səpmək gündəlik qəbul üçün kifayətdir.
Banan
Banan şəkər və lifin ideal birləşməsidir. Bu nisbət, rafinə şəkərlərin yaratdığı ani enerji çöküşü olmadan, bədən üçün davamlı enerji mənbəyi yaradır. Kalium çatışmazlığı da halsızlıq və əzələ zəifliyinə səbəb olur. Banan kaliumla zəngindir və sinir, əzələ fəaliyyətini dəstəkləyir. Diabet və xroniki böyrək xəstəliyi olan şəxslərə isə bananı məhdud miqdarda qəbul etmək tövsiyə olunur.
Yağlı balıqlar
B12 vitamini çatışmazlığı insanın özünü daim yorğun və yuxusuz hiss etməsinə səbəb ola bilər. “Beyin qidası” adlandırılan yağlı balıqlar B12 vitamini ilə zəngindir. Bu vitamin bədəndə qırmızı qan hüceyrələrinin yaranmasını və oksigen daşınmasını təmin edir. Həftədə iki dəfə yağlı balıq yemək B12 çatışmazlığından qaynaqlanan yorğunluğu azaldaraq əhvalı və oyanıqlığı artırır. Bu balıqları qızartmadan, közdə, sobada və ya buxarda bişirmək ən sağlam üsullardandır.
Unutmamalıyıq ki, bədəndə qida, vitamin və mineral çatışmazlığı yuxululuq və halsızlığa səbəb olur. İspanaq, mərcimək, balqabaq tumu, banan və yağlı balıqlar kimi qida baxımından zəngin məhsullar qan dövranını yaxşılaşdırır, qan şəkərini sabit saxlayır və beyin funksiyalarını dəstəkləyir.
Bu cür balanslı qidalanma nəticəsində insan gün ərzində daha oyaq, diqqətli və məhsuldar qala bilər.
