Azərbaycan Türk Dövlətləri Təşkilatının (TDT) fəal üzvü kimi bu ideyanın reallaşması ölkəmiz üçün sadəcə diplomatik bir addım deyil, həm də gələcəyə yönəlmiş böyük bir strateji qazanclardır. Bu gün Türk dünyasının birliyini möhkəmləndirən hər bir təşəbbüs, əslində, Azərbaycanın siyasi, iqtisadi və mədəni gücünün daha da artmasına xidmət edir.
İlk növbədə, TDT Azərbaycanın beynəlxalq nüfuzunu yüksəldir. Qardaş dövlətlərlə bir masa arxasında qərar vermək, ortaq maraqları müdafiə etmək və bir-birinə siyasi dəstək göstərmək Azərbaycanın regional lider kimi rolunu daha da gücləndirir. Bu birlik təkcə kağız üzərində qalmır, real siyasətdə, beynəlxalq münasibətlərdə Azərbaycanın səsini daha gur eşitdirir.
İqtisadi müstəvidə isə TDT-nin imkanları ölkəmiz üçün yeni bir nəfəsdir. Türk dünyasını birləşdirən nəqliyyat dəhlizləri, enerji xətləri və ticarət əlaqələri Azərbaycanın tranzit rolunu ön plana çıxarır. Zəngəzur dəhlizinin reallaşması, Orta Dəhliz layihəsi kimi təşəbbüslər məhz bu əməkdaşlığın nəticəsində mümkündür. Bu, həm regionun iqtisadi xəritəsini dəyişir, həm də Azərbaycanın inkişafına yeni imkanlar açır.
Mədəni baxımdan isə TDT ortaq tariximizin, dilimizin və köklərimizin yenidən dirçəlişi deməkdir. Bu gün Türk dünyasının birliyi sadəcə siyasi maraqlarla yox, dərin mədəni və mənəvi bağlarla formalaşır. Təhsil, elm, gənclər və mədəniyyət sahəsindəki əməkdaşlıqlar bizi bir-birimizə daha çox yaxınlaşdırır.
Bütün bunların fonunda Türk Dövlətləri Təşkilatı Azərbaycanın gələcəyinə inamın, birlikdə gücün və ortaq inkişafın rəmzidir. Bu ideyanın reallaşması ilə Azərbaycan təkcə regionda deyil, bütün türk dünyasında mərkəzi bir rol oynamağa doğru irəliləyir.
Bir sözlə, TDT Azərbaycan üçün həm bu günün, həm də sabahın uğur modelidir – birliyin gücü, sabitliyin təminatı və milli maraqların qorunmasının ən etibarlı platformasıdır.
Həsən Məmmədov
Paraqraf.com
