Rusiya sərhədi yaxınlığında itkin düşən Norveç əsgərləri tapılıblar

Oktyabrın 2-də Rusiyanın Murmansk vilayəti ilə həmsərhəd olan, ölkənin ən şimal bölgəsi sayılan Finmark əyalətində təlimlər zamanı itkin düşən 5 Norveç əsgəri sağ-salamat tapılıb.

Paraqraf.com xəbər verir ki, bu barədə TV2 telekanalı polisə istinadən məlumat verib.

Onların axtarışlarına beş əsgərlə əlaqə kəsildikdən sonra başlanılıb. Operativ Qərargahın rəhbəri Haukland Hansenin sözlərinə görə, ilkin olaraq 10 əsgər itkin düşüb, lakin onlardan beşi axtarış əməliyyatı zamanı aşkarlanıb.

“Oktyabrın 3-də əsgərlərin hamısı sağ-salamat tapılıb”, – deyə TV2 xəbər verib.

Telekanalın məlumatına görə, polis səhər tezdən Norveç hərbçilərindən beş əsgərin yerinin müəyyən edildiyi barədə məlumat alıb. Onların bəzisi E6 şosesi boyunca hərbçilər tərəfindən qurulan nəzarət-buraxılış məntəqəsinə yaxınlaşıb. Qrupun digər üzvləri əlaqə kanalları vasitəsilə özləri barədə xəbər veriblər.

Silahlı Qüvvələrin nümayəndələri onların tapıldığı yerə yollanıblar. Əsgərlərin tibbi yardıma ehtiyaclarının olması barədə məlumat verilməyib.

Paraqraf.com