“Araz-Naxçıvan”ın UEFA Çempionlar Liqasındakı bütün rəqibləri bəlli olub

Futzal üzrə UEFA Çempionlar Liqasının əsas mərhələsində iştirak edəcək “Araz-Naxçıvan” komandasının yer aldığı 5-ci qrupun bütün iştirakçıları müəyyənləşib.

Paraqraf.com xəbər verir ki, ilkin mərhələ qarşılaşmalarından sonra C qrupunun qalibi “Buba Mara” (Bosniya və Herseqovina) və D qrupunun lideri “Uypeşt” (Macarıstan) Naxçıvan təmsilçisinin rəqibləri olublar.

Püşkatmanın nəticəsinə əsasən, 5-ci qrupa E qrupunun qalibi qoşulmalı idi. Lakin həmin qrupda Ermənistan çempionu “Unisport” birinci yeri tutub. UEFA İcraiyyə Komitəsinin qərarına əsasən, Azərbaycan və Ermənistan təmsilçiləri bir qrupda yer ala bilməyəcəyi üçün E yox, D qrupunun birincisi 5-ci qrupa vəsiqə qazanıb.

Beləliklə Polşada keçiriləcək bu mərhələnin oyunlarında Azərbaycan təmsilçisi ilə yanaşı “Piast” (Polşa), “Buba Mara” (Bosniya və Herseqovina) və “Uypeşt” (Macarıstan) komandaları güclərini sınayacaqlar.

Qeyd edək ki, “Araz-Naxçıvan” bu turnirdə sayca 21-ci dəfə iştirak edəcək və bu göstəricidə yalnız Qazaxıstanın “Kayrat” klubundan geri qalır. Turnir oktyabrın 27-dən noyabrın 1-dək təşkil olunacaq.

 

Paraqraf.com