Azərbaycan–Özbəkistan arasında yüksək səviyyəli münasibətlər mədəniyyət və incəsənət sahəsində yeni əməkdaşlıq imkanları açır
Azərbaycan və Özbəkistan münasibətləri yalnız siyasi və iqtisadi əlaqələrlə məhdudlaşmır. Bu münasibətlərin ən möhkəm dayaqlarından biri xalqlarımızı əsrlər boyu bir-birinə bağlayan ortaq tarix, zəngin mədəni irs, milli-mənəvi dəyərlər və qardaşlıq ruhudur.
İki xalqın musiqisində, ədəbiyyatında, sənətində, adət-ənənələrində və ailə dəyərlərində bir-birinə yaxın çoxsaylı xüsusiyyətlər mövcuddur. Bu yaxınlıq xalqlarımız arasında qarşılıqlı rəğbətin və mənəvi bağlılığın formalaşmasına mühüm təsir göstərib. Azərbaycan muğamı ilə Özbəkistanın ənənəvi musiqi irsi, milli rəqslərimiz, sənətkarlıq nümunələrimiz və folklor ənənələrimiz müxtəlif formalarda ifadə olunsa da, onların hər birində eyni mənəvi köklərin izlərini görmək mümkündür.
Bu baxımdan, Azərbaycan–Özbəkistan münasibətlərinin inkişafında mədəni əməkdaşlığın xüsusi əhəmiyyəti var. Mədəniyyət xalqları bir-birinə daha yaxından tanıdır, ortaq dəyərləri yaşadır və onları gələcək nəsillərə ötürür. Birgə mədəni tədbirlərin, yaradıcılıq layihələrinin, festival və sərgilərin keçirilməsi, incəsənət kollektivlərinin qarşılıqlı səfərləri bu əlaqələrin daha da möhkəmlənməsinə xidmət edir.
Azərbaycan və Özbəkistanın zəngin mədəni irsi təkcə keçmişimizin yadigarı deyil, həm də gələcəyimiz üçün böyük imkanlar yaradan mənəvi sərvətdir. Biz bu irsi qorumaqla yanaşı, müasir dövrün imkanlarından istifadə edərək onu daha geniş coğrafiyada tanıtmalı, gənc nəsillərə sevdirməliyik.
Bu gün iki qardaş ölkə arasında münasibətlərin yüksək səviyyədə olması mədəniyyət və incəsənət sahəsində də yeni əməkdaşlıq imkanları yaradır. Əminəm ki, Azərbaycan və Özbəkistan yaradıcı insanlarının, mədəniyyət xadimlərinin, gənclərinin və vətəndaş cəmiyyəti institutlarının birgə təşəbbüsləri xalqlarımızı daha da yaxınlaşdıracaq.
Azərbaycan–Özbəkistan qardaşlığı bizim üçün yalnız diplomatik münasibət anlayışı deyil. Bu, xalqlarımızın yaddaşında yaşayan, mədəniyyətimizdə və milli-mənəvi dəyərlərimizdə öz əksini tapan böyük bir bağlılıqdır. Bu bağlılığın qorunması və gələcək nəsillərə ötürülməsi hər birimizin üzərinə düşən mühüm məsuliyyətdir.
İnanıram ki, Azərbaycan və Özbəkistan arasında mədəni əlaqələr bundan sonra da inkişaf edəcək, iki xalqın ortaq dəyərlərinin dünyaya tanıdılmasına və qardaşlıq münasibətlərimizin daha da möhkəmlənməsinə mühüm töhfə verəcək.
Turanə Orucova
İncəsənətin Tərəqqisinə Dəstək İctimai Birliyinin sədri
