Azərbaycanda ən çox böyrək köçürülməsinə ehtiyac var – Son rəqəmlər
Azərbaycanda ölümündən sonra orqan donoru olmağa razılıq verən şəxslərin sayı 1600 nəfəri ötüb.
Paraqraf.com xəbər verir ki, bu barədə Modern.az-ın sorğusuna cavab olaraq Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzindən məlumat verilib.
Bildirilib ki, təkcə 2026-cı ilin ilk 5 ayı ərzində təxminən 300 nəfər ölümündən sonra orqanlarını bağışlamaq üçün razılıq ərizəsi imzalayıb.
Məlumata görə, hazırda orqan və toxuma transplantasiyası üçün gözləmə siyahısında 1400-ə yaxın şəxs qeydiyyatdadır. Gözləmə siyahısında olan xəstələr arasında isə ən çox ehtiyac duyulan orqan böyrəkdir.
“2026-cı ilin əvvəlindən bu günədək ölkədə ümumilikdə 120-yə yaxın transplantasiya əməliyyatı həyata keçirilib. Bunların 50-dən çoxunu böyrək, 30-a yaxınını qaraciyər, 20-yə yaxınını sümük iliyi və 20-yə yaxınını isə buynuz qişa (kornea) transplantasiyası təşkil edib.
Bu göstəricilər ölkədə transplantasiya xidmətlərinin davamlı inkişaf etdiyini və donor sisteminin gücləndirilməsi istiqamətində görülən işlərin nəticə verdiyini göstərir”, – deyə rəsmi məlumatda qeyd olunub.
Paraqraf.com
