Cənubi Koreyanın Koreyalararası sərhəddə yerləşən və hərbi nəzarət altında olan bölgədə mülki şəxslərin girişinə dair məhdudiyyətləri azaltmağa hazırlaşdığı bildirilib.
Paraqraf.com xəbər verir ki, Cənubi Koreyanın müdafiə naziri Ahn Gyu-bak məsələ ilə bağlı açıqlama verib.
Ahn bildirib ki, iki Koreya arasındakı sərhəd xətti olan Hərbi Demarkasiya Xəttinin (MDL) cənubunda yerləşən və bu günədək 10 kilometrədək uzanan Mülki Nəzarət Xətti (CCL) orta hesabla 6 kilometrə endiriləcək.
Nazir qeyd edib ki, CCL mülki şəxslərin girişini məhdudlaşdırmaq və hərbi əməliyyatların təhlükəsizliyini təmin etmək məqsədilə yaradılıb. O əlavə edib ki, gələcək təhlükəsizlik şəraitinə uyğunlaşmaq üçün CCL ilə bağlı yeni tənzimləmə planı hazırlanıb.
Müdafiə Nazirliyi də açıqlamasında bildirib ki, plan çərçivəsində “Nəzarətli Mühafizə Bölgəsi” kimi təsnif edilən CCL əraziləri “Məhdud Mühafizə Bölgəsi” statusuna keçiriləcək. Bu dəyişiklik aidiyyəti qurumların razılığı ilə torpaq inkişafı və tikinti fəaliyyətlərinə icazə verilməsinə şərait yaradacaq.
Qeyd olunub ki, sözügedən plan yekunlaşdırıldıqdan sonra mərhələli şəkildə həyata keçiriləcək.
