Maka Boçorişvili İstanbulda Ceyhun Bayramovla danışıqları yüksək qiymətləndirib

Gürcüstanın xarici işlər naziri Maka Boçorişvili azərbaycanlı həmkarı Ceyhun Bayramovla İstanbulda keçirilən danışıqları məhsuldar adlandırıb.

Paraqraf.com Gürcüstan mediasına istinadən xəbər verir ki, o, bu barədə jurnalistlərlə söhbətində bildirib.

Nazirin sözlərinə görə, ikitərəfli danışıqlar zamanı əsas diqqət son yüksək səviyyəli təmaslara və Azərbaycanla Gürcüstan arasında əməkdaşlığın inkişafına yönəldilib.

“Mənim Azərbaycanın xarici işlər naziri ilə çox müsbət söhbətim oldu. Son vaxtlar biz ölkələrimiz arasında yüksək səviyyədə intensiv qarşılıqlı fəaliyyət müşahidə edirik. Azərbaycan Prezidenti İlham Əliyev Gürcüstana səfər edib, Baş nazir İrakli Kobaxidze Bakıda olub, mühüm sazişlər imzalanıb. Bu yaxınlarda dəmir yolu əlaqəsi də bərpa olundu. Bu isə ikitərəfli münasibətlərin inkişafında, xüsusən də insanlararası əlaqələr sahəsində daha bir müsbət addım olub. Biz əməkdaşlığın hazırkı vəziyyətini, münasibətlərin gələcək inkişafı və beynəlxalq arenada qarşılıqlı fəaliyyət üçün mühüm əhəmiyyət kəsb edən məsələləri müzakirə etdik”, – M.Boçorişvili bildirib.

Nazir İstanbulda Türkiyə, Azərbaycan və Gürcüstan xarici işlər nazirlərinin 10-cu üçtərəfli görüşünün yekunlarını da şərh edib: “Bu, üçtərəfli əməkdaşlığımızın vəziyyətini qiymətləndirmək üçün yaxşı fürsətdir. Biz həm uğurla həyata keçirilmiş layihələri, həm də regional bağlantının təmin edilməsində dövlətlərimizin rolunun daha da möhkəmlənməsinə kömək edəcək gələcək təşəbbüsləri müzakirə etdik”.

 

Paraqraf.com