ADPU-nun müəllimləri Pekində süni intellekt seminarında iştirak ediblər
Çin Xalq Respublikasının paytaxtı Pekin şəhərində Çin Xarici İqtisadi Ticarət Universiteti tərəfindən “Təhsildə innovasiyalar və süni intellekt” mövzusunda beynəlxalq təlim-seminar təşkil olunub.
Paraqraf.com xəbər verir ki, təlim çərçivəsində iştirakçılara ali təhsil sistemində rəqəmsal transformasiya prosesləri, süni intellekt texnologiyalarının tədrisə inteqrasiyası, innovativ öyrənmə modelləri və müasir pedaqoji yanaşmalar barədə ətraflı məlumat verilib. Mütəxəssislər süni intellektin təhsil keyfiyyətinin yüksəldilməsi, fərdi təhsil imkanlarının genişləndirilməsi və idarəetmə mexanizmlərinin təkmilləşdirilməsindəki rolunu geniş şəkildə təqdim ediblər.
Seminarın əsas müzakirə mövzularından biri də rəqəmsallaşmanın təhsil mühitində yaratdığı yeni reallıqlar olub. Ekspertlər süni intellektin sürətli inkişafı fonunda əmək bazarında baş verən dəyişiklikləri, yeni peşələrin meydana çıxmasını və ənənəvi peşələrin transformasiyasını təhlil ediblər. Eyni zamanda vurğulanıb ki, texnoloji yeniliklərə baxmayaraq, yaradıcılıq, analitik düşüncə, etik davranış, kommunikasiya bacarıqları və emosional intellekt gələcəyin təhsil sistemində əsas dəyərlər kimi qalacaq.
Azərbaycan Dövlət Pedaqoji Universitetinin (ADPU) İbtidai təhsil fakültəsinin dekan müavini Sevinc Elyazova və Azərbaycan coğrafiyası və coğrafiyanın tədrisi texnologiyası kafedrasının müəllimləri – Əməkdar müəllim, İradə Nağıyeva, Nəzakət Zamanova da seminarda iştirak ediblər. Əməkdaşlarımız Çin universitetlərinin qabaqcıl təcrübələri ilə tanış olmaqla yanaşı, müxtəlif ölkələrdən olan mütəxəssislərlə fikir mübadiləsi aparıblar.
