Azərbaycanda insanların böyük hissəsi həyatları boyu heç vaxt xarici ölkəyə səfər etməyib. Türkiyə statistik mənbələrinin yaydığı məlumata görə, Azərbaycan əhalisinin təxminən 90 faizi indiyədək ölkə sərhədlərindən kənara çıxmayıb. Bu göstərici ilə Azərbaycan Hindistan, Banqladeş, İndoneziya, Türkiyə və Misir kimi ölkələrin yer aldığı siyahıda göstərilir.
Turizm üzrə ekspert Kənan Hənifəyev “Paraqraf.com”a açıqlamasında bildirib ki, ümumi mənzərə real vəziyyətə uyğundur:
“10 milyon əhalinin təxminən 1 milyonunun səyahət etməsi son 7 ilin statistikasına baxdıqda normal göstəricidir. Çünki 2020-ci ildən sonra baş verən hadisələr və son illərdə quru sərhədlərin bağlı qalması bu rəqəmlərə birbaşa təsir göstərib. Ölkədə il ərzində 300-400 min yerli turist aktivliyi müşahidə olunur. Vətəndaşlar minimum ildə bir dəfə xarici ölkələrə səfər etməyə çalışırlar”.
Ekspertin sözlərinə görə, bu göstəricinin dəyişməsinə təsir edən bir sıra amillər var:
“Əsas məsələlərdən biri nəqliyyat qiymətlərinin əlçatan olmasıdır. Həmkarlar ittifaqları müəyyən proqramlar çərçivəsində xarici səfərləri təşviq etməli, qonşu ölkələrə kommersiya və turizm məqsədli səfərlərin təşkili artırılmalıdır. Xarici pasportun əldə olunması prosesinin sadələşdirilməsi də mühüm amillərdəndir. Sosial və psixoloji faktorlar da insanların səyahət qərarına təsir edir. Sərhədlərin tam açılmasından sonra isə bu göstəricidə müsbət dəyişiklik gözlənilir”.
Kəmalə Vəliyeva
Paraqraf.com
