Ümummilli lider Heydər Əliyevin anadan olmasının 103-cü ildönümü münasibətilə onun əziz xatirəsini böyük hörmət və ehtiramla yad edirəm.
Mən uzun illər Rusiyada yaşasam da, harada olmağımdan asılı olmayaraq hər zaman Azərbaycanla nəfəs almışam. Vətəndən uzaqda yaşayan bir azərbaycanlı kimi milli birliyin, diaspor fəaliyyətinin və Azərbaycan adının uca tutulmasının nə qədər vacib olduğunu dərindən hiss etmişəm.
Ulyanovsk şəhərində Azərbaycan icmasının yaradılması da məhz bu düşüncədən doğan ideyalardan biri idi. Məqsədimiz həmvətənlərimizi bir araya gətirmək, milli dəyərlərimizi qorumaq və Azərbaycan həqiqətlərini yaşadığımız cəmiyyətə çatdırmaq idi.
Birinci Qarabağ savaşı illərində də Azərbaycan ordusuna yardım göndərilməsi üçün əlimdən gələni etmişəm. O ağır günlərdə Vətənin yanında olmaq hər bir azərbaycanlının mənəvi borcu idi.
Fəaliyyətim dövründə ümummilli lider Heydər Əliyevlə dəfələrlə görüşmək mənə nəsib olub. Onun öyüd-nəsihətləri, dövlətçilik düşüncəsi və Azərbaycan sevgisi mənim üçün hər zaman örnək olub.
Heydər Əliyev bizə güclü dövlət, milli birlik və azərbaycançılıq ideyasına sədaqət nümunəsi qoyub. Onun adı Azərbaycan xalqının yaddaşında daim yaşayacaq.
Şakir Göyüşov
Dədə Ələsgər Ocağı İctimai Birliyinin Müşahidə Şurasının sədri
