Son dövrlərdə kartdan-karta ödənişlər geniş yayılıb. Bu isə nağd ödəniş edənlərin sayının azalmasına səbəb olur. Son günlər sosial şəbəkələrdə “vətəndaşlar kartdan-karta ödəniş edərkən onlardan vergi tutulacaq” kimi fikirlər səsləndirilir. Bu da vətəndaşlar arasında narahatlıq yaradır.
İqtisadçı-ekspert Bella Bəşirova “Paraqraf.com”a bildirib ki, hazırda ölkədə şəxsi məqsədlərlə edilən adi köçürmələrə, ailə üzvlərinə pul göndərilməsi, borcun qaytarılması, hədiyyə və ya gündəlik şəxsi ödənişlərə görə ayrıca vergi tətbiq olunmur:
“Vergi məsələsi daha çox sistemli və davamlı şəkildə kommersiya fəaliyyəti həyata keçirən şəxslərlə bağlı gündəmə gəlir. Yəni bir şəxs kart hesabı üzərindən mütəmadi şəkildə mal satışı və ya xidmət fəaliyyəti göstərir, lakin bunu rəsmi şəkildə qeydiyyata almırsa, həmin əməliyyatlar gəlir kimi qiymətləndirilə və qanunvericiliyə uyğun vergi öhdəliyi yarada bilər.
Burada əsas məqsəd adi vətəndaşın şəxsi köçürmələrini vergiyə cəlb etmək deyil, kölgə iqtisadiyyatının qarşısını almaq, qeyri-rəsmi ticarət dövriyyəsini şəffaflaşdırmaq və vergidən yayınma hallarını azaltmaqdır. Dünyanın bir çox ölkəsində də oxşar nəzarət mexanizmləri tətbiq olunur.
Buna görə vətəndaşların panikaya düşməsinə əsas yoxdur. Şəxsi və gündəlik istifadə xarakterli kart köçürmələrinin vergiyə cəlb olunması ilə bağlı rəsmi qərar açıqlanmayıb. Lakin sahibkarlıq fəaliyyəti ilə məşğul olan şəxslərin fəaliyyətlərini qanunvericiliyə uyğun rəsmiləşdirməsi vacib olaraq qalır”.
Kəmalə Vəliyeva
Paraqraf.com
