Bəzi sakinlər həyət evlərinin qarşısındakı sahələrdən rahatlıqla istifadə edirlər. Lakin həmin torpaq sahəsi onların çıxarışında qeyd olunmayıb. Buna baxmayaraq, həmin ərazidə avtomobillərini saxlayır və ya gül-çiçək əkirlər.
Vəkil Lalə Salmanova “Paraqraf.com”a bildirib ki, binaların arasında parkinq olmur, kimsə də gəlib orada maşınını saxlayır, sonra da problem yaranır:
“Parkinqdə şəxs rüsum ödəyir. Lakin həyət evlərində, binaların arasında və ya parkinq kimi tənzimlənməyən yerlərdə kiminsə avtomobil saxlaması problem yaradır. Gül-çiçək əkməklə bağlı da qanunvericilikdə xüsusi müddəa yoxdur”.
Vəkil bu hallar zamanı hansı cərimələrin tətbiq oluna biləcəyindən də danışıb:
“253-1.1. Yaşıllıqların uçotunun, kadastrının və monitorinqinin aparılması qaydasının pozulmasına, yəni:
253-1.1.1. mövcud yaşıllıqların uçota alınmamasına və ya kadastrının aparılmamasına;
253-1.1.2. yaşıllıqların kəmiyyət və keyfiyyət göstəriciləri, növü, ərazisi və onlar barədə digər məlumatların təhrif edilməsinə;
253-1.1.3. yaşıllıqların uçotu, kadastrı və monitorinqi haqqında məlumatların müvafiq icra hakimiyyəti orqanına təqdim edilməməsinə görə –
vəzifəli şəxslər min manat, hüquqi şəxslər üç min manat məbləğində cərimə edilir.
253-1.2. Müvafiq icra hakimiyyəti orqanının rəyi olmadan və ya nəzərə alınmadan yaşıllıqların götürülməsi barədə qərarın qəbul edilməsinə görə –
vəzifəli şəxslər beş min manat məbləğində cərimə edilir.
253-1.3. Götürülmüş yaşıllıqların yerinin dəyişdirilməməsinə və ya bərpa edilməməsinə, yaxud zədələnmiş və ya məhv edilmiş yaşıllıqların və ya onların hissələrinin bərpa edilməməsinə görə –
fiziki şəxslər min manat, vəzifəli şəxslər üç min manat, hüquqi şəxslər on min manat məbləğində cərimə edilir.
253-1.4. Şəhərlərdə və digər yaşayış məntəqələrində yerləşən yaşıllıqların məhv edilməsinin və ya yaşıllıq ərazilərində qanuna zidd digər hərəkətlərin qarşısının alınmamasına, yaxud qanunla müəyyən edilən mühafizə tədbirlərinin görülməməsinə görə –
vəzifəli şəxslər min manat, hüquqi şəxslər üç min manat məbləğində cərimə edilir.
Eyni zamanda, Maddə 242. Xüsusi mühafizə olunan təbiət ərazilərindən istifadə qaydalarının pozulması.
Xüsusi mühafizə olunan təbiət ərazilərindən istifadə qaydalarının, həmin ərazilərin mühafizə rejiminin pozulmasına görə –
fiziki şəxslər dörd yüz manatdan altı yüz manatadək, vəzifəli şəxslər iki min manatdan üç min manatadək məbləğdə cərimə edilir”.
Kəmalə Vəliyeva
Paraqraf.com
