Azərbaycanın səhiyyə və turizm sektorları arasında strateji körpü rolunu oynayan “Medical Tourism: InfoTour & Networking” layihəsinin növbəti mərhələsi yüksək təşkilatçılıq səviyyəsində baş tutub. Layihə HIMA – Hub Integrated Medical Alliance tərəfindən həyata keçirilərək, Referans Medical Group-a daxil olan Leyla Medical Centerdə təşkil olunub.
Tədbir Azərbaycanın müasir tibbi imkanlarının və beynəlxalq standartlara cavab verən səhiyyə xidmətlərinin turizm sektoru nümayəndələrinə təqdim olunması baxımından mühüm platforma rolunu oynayıb. Eyni zamanda, görüş sektorlararası əməkdaşlığın dərinləşdirilməsi və tibbi turizmin davamlı inkişafı üçün yeni perspektivlərin formalaşmasına zəmin yaradıb.
Info-tur çərçivəsində iştirakçılar “Leyla Medical Center”in qabaqcıl tibbi texnologiyaları, innovativ xidmət modeli və pasiyent mərkəzli yanaşması ilə ətraflı tanış olublar. Tədbir zamanı Azərbaycanın regional tibbi turizm mərkəzinə çevrilməsi istiqamətində atılan addımlar, eləcə də xarici pasiyent axınının effektiv idarə olunması üçün strateji yanaşmalar geniş müzakirə edilib.
Anar Yusifov, “Referans Medical Group”un Strateji Marketinq və Tibbi Turizm üzrə meneceri çıxışında qeyd edib:
“Bu kimi təşəbbüslər Azərbaycanın tibbi turizm potensialını qlobal səviyyədə tanıtmaqla yanaşı, yerli tibb müəssisələrinin beynəlxalq bazara inteqrasiyasını sürətləndirir və yeni tərəfdaşlıqların formalaşmasına təkan verir”.
HIMA – Hub Integrated Medical Alliance-nin təsiscisi və direktoru Elnarə Musəvi isə qeyd edib ki, təşəbbüs uzunmüddətli strateji məqsədlərə xidmət edir:
“Bizim əsas hədəfimiz Azərbaycanın tibbi turizm imkanlarını sistemli şəkildə inkişaf etdirmək, səhiyyə və turizm sektorları arasında effektiv əməkdaşlıq modeli formalaşdırmaq və ölkəmizi bu sahədə regional liderlərdən birinə çevirməkdir”.
“Medical Tourism: InfoTour & Networking” layihəsi növbəti mərhələlərdə ölkənin digər aparıcı tibb müəssisələrini də əhatə edərək, Azərbaycanın beynəlxalq tibbi turizm bazarındakı mövqeyini daha da möhkəmləndirməyi hədəfləyir.
Paraqraf.com
