“Qarabağ”ın baş məşqçisi Qurban Qurbanov növbəti sərt addımı ilə diqqət çəkib.
Ağdam klubunun çalışdırıcısı Abbas Hüseynov və əsas heyətin üzvlərindən biri Elvin Cəfərquliyevi əvəzedici komandaya göndərib.
İdman şərhçisi Rövşən Binnətli Paraqraf.com-a açıqlamasında bildirib ki, Elvinin əvəzedici komandaya göndərilməsi klubdaxili intizam qaydalarının pozulması ilə bağlıdır:
“Beynəlxalq təcrübədə belə hallarda futbolçu adətən bir neçə oyunda əsas heyətə buraxılmır və ya cərimələnir. Bu, müqavilə şərtlərinə uyğun tətbiq edilən prosedurdur. Görünür, “Qarabağ”da cəza tədbirləri sırasında əvəzedici heyətə göndərilmək də var. Üstəlik, bu cür hal artıq ilk dəfə deyil ki, təkrarlanır”.
Şərhçi Elvinin əvəzedici komandaya göndərilməsinin komandaya təsirinə də münasibət bildirib:
“Bu, təqdir ediləsi addım deyil. Amma verilən qərar yalnız konkret futbolçuya yox, bütün komandaya mesaj xarakteri daşıyır və komandadaxili intizamın qorunmasına xidmət edir”.
Rövşən Binnətli “Qarabağ”ın son dövrlər “Sabah”a qarşı uğursuz nəticələrinə də toxunub:
“Bu oyunların əksəriyyəti son dövrə təsadüf edir və komandalar arasında prinsipiallıq məhz bu mövsüm artıb. Çempionlar Liqasında uğurlu çıxış ‘Qarabağ’a həm fiziki, həm psixoloji, həm də mənəvi baxımdan ciddi yük oldu. Komanda bu itkiləri tam bərpa edə bilmədi. ‘Gəncə’ və ‘Şamaxı’ ilə matçlarda itirilən xallar da bunu göstərir. Əvvəlki illərdə də oxşar hallar yaşanıb, amma komanda bu yükün altından çıxa bilirdi. Bu dəfə isə qarşıda ‘Sabah’ kimi daha iddialı və yaxşı hazırlıqlı rəqib var”.
Kəmalə Vəliyeva
Paraqraf.com
