Son dövrlərdə vətəndaşlara vergi orqanları tərəfindən göndərilən məlumat xarakterli SMS-lərin sayı artmaqdadır. Bu bildirişlər əsasən vergi öhdəlikləri, yeniliklər, borc məlumatları və ya maarifləndirici xarakterli xəbərləri əhatə edir. Rəqəmsallaşmanın genişlənməsi ilə dövlət qurumlarının vətəndaşlarla operativ əlaqə qurmaq üçün bu üsula üstünlük verməsi diqqət çəkir. Lakin bəzi hallarda bu mesajların tezliyi və məzmunu suallar doğurur.
Mövzu ilə bağlı mühasib Əfsanə Əliyeva “Paraqraf.com”a bildirib ki, son dövrlərdə vergi orqanları tərəfindən vətəndaşlara və vergi ödəyicilərinə göndərilən məlumat xarakterli SMS bildirişlərinin artması müşahidə olunur:
“Bu bildirişlər əsasən vergi öhdəlikləri, qanunvericilikdə baş verən dəyişikliklər, borc vəziyyəti və digər maarifləndirici məlumatları əhatə edir. Qeyd olunan SMS bildirişləri vergi ödəyicilərinin operativ şəkildə məlumatlandırılması baxımından müsbət qiymətləndirilməlidir. Xüsusilə vergi qanunvericiliyində baş verən dəyişikliklər və öhdəliklərlə bağlı vaxtında məlumat əldə olunması sahibkarların fəaliyyətinin düzgün təşkili üçün əhəmiyyətlidir.
Bununla yanaşı, SMS bildirişlərinin məzmununun daha hədəfli və konkret olması, eləcə də göndərilmə tezliyinin optimal səviyyədə tənzimlənməsi onların effektivliyini daha da artıra bilər və əlavə narahatlıq hallarının qarşısını ala bilər”.
Kəmalə Vəliyeva
Paraqraf.com
