Yerli idarəetmə hər bir cəmiyyətin inkişafında mühüm rol oynayır. Bu idarəetmə forması əhalinin gündəlik problemlərinin həllinə, sosial rifahın yaxşılaşdırılmasına və yerli resurslardan səmərəli istifadəyə xidmət edir. Lakin bir çox hallarda yerli idarəetmədə şəffaflığın aşağı olması, vətəndaş iştirakının zəifliyi, resursların düzgün bölüşdürülməməsi və idarəetmə bacarıqlarının yetərli səviyyədə olmaması kimi problemlər müşahidə olunur. Bu çətinliklər isə yerli inkişafın ləngiməsinə və əhalinin dövlət orqanlarına olan inamının azalmasına səbəb olur.
Bəs yerli idarəetmədə mövcud olan problemlərin əsas səbəbləri nələrdir və onların aradan qaldırılması üçün hansı tədbirlər görülməlidir?
Milli Məclisin deputatı, Ana Vətən Partiyasının sədri Günay Ağamalı Paraqraf.com-a bildirib ki, yerli idarəetmə cəmiyyətin inkişafının ən vacib sütunlarından biridir:
“Bu sahədə formalaşan münasibətlər vətəndaş məmnunluğuna, sosial rifaha təsir göstərir. Yerli idarəetmədə mövcud problemlərin aradan qaldırılması üçün rəqəmsal idarəetmə mexanizmlərinin genişləndirilməsi, açıq məlumat bazalarının formalaşdırılması və ictimai nəzarətin institusional əsasda təşkili bu istiqamətdə mühüm rol oynaya bilər. Bu cür yanaşma dövlətlə vətəndaş arasında qarşılıqlı etimadı möhkəmləndirəcək və yerli səviyyədə problemlərin daha operativ həllinə imkan yaradacaq. Kadr potensialının gücləndirilməsi də prioritet məsələlərdəndir. Yerli idarəetmə orqanlarında çalışan vətəndaşların peşəkarlığının artırılması, onların müasir idarəetmə standartlarına uyğun hazırlanması və davamlı təlim proqramlarına cəlb olunması idarəetmənin keyfiyyətini əhəmiyyətli dərəcədə yüksəldə bilər.
Dövlətimiz yerli idarəetmənin təkmilləşdirilməsi istiqamətində ardıcıl siyasət yürüdür və bu siyasətin mərkəzində vətəndaş rifahının yüksəldilməsi dayanır. Möhtərəm cənab Prezident İlham Əliyevin bu sahəyə göstərdiyi diqqət və siyasi iradə nəticəsində yerli idarəetmə sistemi daha çevik, şəffaf və effektiv modelə doğru inkişaf edir. Sözügedən yanaşma dövlətimizin maraqlarının qorunmasına, cəmiyyətin dayanıqlı inkişafına mühüm töhfə verir”.
Kəmalə Vəliyeva
Paraqraf.com
