Son illər paytaxtda avtomobillərin sayının artması və ictimai nəqliyyatda yaranan sıxlıq sakinlərin gündəlik həyatını çətinləşdirən əsas problemlərdən birinə çevrilib. Xüsusilə pik saatlarda müşahidə olunan tıxaclar və gecikmələr həm vaxt itkisinə, həm də əlavə stressə səbəb olur.
Bu fonda bu gündən etibarən şəhərdə yeni ictimai nəqliyyat xətti istifadəyə verilib. Səlahiyyətli qurumların bildirdiyinə görə, yeni marşrut əsasən ən çox yüklənmiş istiqamətləri əhatə edəcək və sərnişin axınının balanslaşdırılmasına kömək edəcək.
Bəs bu yenilik mövcud problemi həqiqətən aradan qaldıra biləcək, yoxsa sadəcə müvəqqəti həll kimi qalacaq?
Nəqliyyat eksperti Paraqraf.com-a açıqlamasında bildirib ki, hazırda ölkədə ictimai nəqliyyat sistemi əsasən metro və avtobuslardan ibarətdir:
“Ölkədə ictimai nəqliyyatın yenidən inkişafı prosesi mərhələli şəkildə tənzimlənir. Xəttə buraxılan avtobusların sayı artırılır, xaricdən ekoloji cəhətdən təmiz yeni avtobuslar alınır. Eyni zamanda, bu nəqliyyat vasitələrinin ölkə daxilində istehsalı ilə bağlı da işlər aparılır. Metropoliten üzrə isə yeni stansiyalar tikilir, qatarların sayı artırılır. Qatarlar arasındakı intervalın azaldılması sərnişinlərin daha operativ daşınmasına xidmət edir.”
Ekspert əlavə edib ki, gələcək planlara tramvay xəttinin çəkilməsi də daxildir:
“Hazırda əsas yük metro və avtobusların üzərinə düşür. Buna görə də Bakıda və ətraf ərazilərdə avtobuslara tələbatın artması təbiidir. Zəruri istiqamətlər üzrə yeni marşrutların açılması müsbət addımdır və əhalinin rahatlığına xidmət edir. Özəl daşıyıcı şirkətlər avtobus parklarını yenilədikcə bu problemlər mərhələli şəkildə aradan qalxacaq.”
Kəmalə Vəliyeva
Paraqraf.com
