Son illərdə kreditlər bir çox insan üçün gündəlik həyatın ayrılmaz hissəsinə çevrilib. İnsanlar ev almaq, biznes qurmaq, təhsil xərclərini ödəmək və ya sadəcə gündəlik ehtiyaclarını qarşılamaq üçün banklara müraciət edirlər. Bank sektorunun inkişafı və kreditlərin daha əlçatan olması bu prosesi daha da sürətləndirib.
Lakin kreditlərin geniş yayılması ilə yanaşı, başqa bir problem də gündəmə gəlir. Bəzi vətəndaşlar borclarını ödəməkdə çətinlik çəkir, yeni kredit götürərək əvvəlki borclarını bağlamağa çalışırlar. Bu isə insanları getdikcə daha böyük maliyyə yükü ilə üz-üzə qoyur.
Maraqlıdır, kreditlərin bu qədər geniş yayılması cəmiyyət üçün normal iqtisadi prosesdir, yoxsa getdikcə təhlükəli bir asılılığa çevrilir?
İqtisadçı Natiq Cəfərli “Paraqraf.com”a bildirib ki, kreditlərin geniş yayılması Azərbaycanda təəccüblə qarşılanır:
“Dünya uzun illərdir ki, kreditlər hesabına yaşamağa öyrəşib. Azərbaycanda problem ondadır ki, kredit faizləri çox yüksəkdir. Buna görə də insanlar götürdükləri krediti digər bankla ödəməyə məcbur qalırlar. Amma kreditə pul götürən varsa, demək pul qazanan da var. Ona görə də bu, böyük problem deyil. Amerika və Avropada kredit faizləri 3-4%-dir. Lakin Azərbaycanda isə istehlak kreditləri 20%-ə yaxındır”.
Kəmalə Vəliyeva
Paraqraf.com
