Azərbaycan Dövlət Təhlükəsizliyi Xidmətinin yaydığı məlumat dövlət çevrilişinin təşkilinə görə həbs edilmiş Ramiz Mehdiyev, Əli Kərimli, Məmməd İbrahim və digərilərinin bu cinayət əməlini Rusiya xüsusi xidmət orqanlarının sifarişi əsasında törətmək istədiklərini rəsmən sübut etdi.
Azərbaycan mətbuatı Əli Kərimlinin de-fakto rəhbərlik etdiyi Demokratik Qüvvələrin Milli Şurası adlı qurumun Rusiyanın siyasi layihəsi olduğunu yazanda, AXCP sədrinin dəstəsi ciddi-cəhdlə bu məlumatı təkzib etməyə çalışsa da aparılan araşdırmalar nəticəsində həqiqət aşkara çıxıb. Milli Şuranın Rusiyadan maliyyələşdiyi, bu xəyanətkar şəbəkənin xaricdən idarə olunduğu danılmaz faktlarla ifşa edilib.
Azərbaycan baş nazirinin keçmiş müavini, “Mafioz” ləqəbi ilə tanınmış Abbas Abbasov isə təşəbbüskarı olduğu “Milyarderlər İttifaqı” adlanan qurumun vasitəsilə Milli Şuraya həm maddi, həm də siyasi sponsorluq edib.
Həmin vaxt Azərbaycan Prezident Administrasiyasının rəhbəri vəzifəsində çalışan Ramiz Mehdiyev Rusiyanın xüsusi emissarları və Abbas Abbasovla gizli telefon əlaqəsi saxlayaraq Milli Şuranın təşkilində koordinat funksiyasını yerinə yetirib.
Doğrudanmı, Əli Kərimlinin bu siyasi planlardan xəbəri olmayıb? Əli Kərimlinin Milli Şuranın yaradılmasına xüsusi maraq göstərməsi onun bu “oyun”un içində olduğunu göstərir.
Cinayət işinin detallarından aydın olur ki, Əli Kərimli Azərbaycanda hakimiyyəti ələ keçirmək istəyən qüvvələrlə həm xaricdə, həm də daxildə əlbir olub. Çünki onu yalnız siyasi maraqlar deyil, həm də maddiyyat cəlb edirdi. Ramiz Mehdiyev Kərimliyə və ətrafındakılara ölkədə qeyri-sabitlik yaratmaq üçün pul vəd etmişdi.
Ona görə də Əli Kərimli müxalifət düşərgəsində Milli Şuradan başqa siyasi qüvvənin olmasını qəbul etməyib. Milli Şuraya sədrlik formal olaraq Cəmil Həsənliyə həvalə edilsə də, faktiki olraq siyasi monopoliya Əli Kərimlidə olub. Ona təlimatları isə Ramiz Mehdiyev verib.
Beləliklə, Ramiz Mehdiyev, Abbas Abbasov və Rusiya xüsusi xidmət orqanları səviyyəsində Milli Şura iyerarxik qaydada idarə olunub. Milli Şuranın ən aktiv dövrü də məhz Ramiz Mehdiyevin vəzifədə olduğu illərə təsadüf edir.
“5-ci kolon”un rəhbərinin postundan gedişindən sonra Milli Şura siyasi cəhətdən ölü, fəaliyyətsiz quruma çevrilib. Bütün bunlar “boz kardinal”ın Milli Şuranı himayə etmək imkanlarının tükənməsi ilə bağlıdır.
Hazırda sözügedən cinayətdə adı hallanan Abbas Abbasovun Rusiyada gizlənməsi isə onun fakt qarşısında qaldığını nümayiş etdirir. Abbas Abbasov günahının olmadığına cüzi də olsa əmin olsaydı, qaçıb gizlənmək əvəzinə gəlib istintaqa ifadə verərdi.
Süleyman
