Millət vəkili Ceyhun Məmmədov gənclərə ünvanladığı tövsiyələrini yenidən bölüşərək, dürüstlük, vicdan və mənəvi dəyərlərin həyatdakı əhəmiyyətinə diqqət çəkib. O, bildirib ki, insan hər zaman əməllərinə görə məsuliyyət daşıdığını unutmamalı və həyatını doğru prinsiplər üzərində qurmalıdır.
Paraqraf.com millət vəklinin gənclərə tövsiyələrini təqdim edir:
-
“Məndən ötdü, kimə dəyir, dəysin” düşüncəsi ilə yaşayanlardan olmayın. Bilin ki, sizdən ötən bir gün sizə də dəyəcək.
-
“Dünyanı düzəltmək sənə qalmayıb”, “Palaza bürün, elnən sürün” deyənlərə fikir verməyin. Bəzən bir insan bütün dünyanı düzəldə, ya da məhv edə bilər.
-
“Dünya beş günlükdür, nə qədər ki, varsan kef elə” deyənlərə qulaq asmayın. Dünya müvəqqəti olsa da, hesabı çox ağırdır. Çalışın, daha çox yaxşı əməl sahibi olun.
-
Bir gün hər kəsin əkdiyini biçəcəyini unutmayın. Ona görə nə isə əkəndə baxın, nə əkirsiniz. Sonrakı peşmançılıq fayda verməyəcək.
-
Yaşadığımız dünyanın müvəqqəti olduğunu unutmayın. Hələ heç kim bu dünyadan o dünyaya əməldən başqa heç nə aparmayıb.
-
Hansı vəziyyətdə və şəraitdə olmağınızdan asılı olmayaraq prinsip və dəyərlərinizə hər zaman sadiq olun.
-
Hər zaman dürüst və səmimi olun. Həyatda uğurun başlıca şərtlərindən birinin dürüstlük və səmimilik olduğunu unutmayın.
-
Heç zaman Allahı unutmayın. Allahın qəzəbinə səbəb olacaq əməllərdən daima uzaq olun.
-
Bütün işlərinizi vicdanla və insafla görün. Heç zaman işinizə və vicdanınıza xəyanət etməyin.
-
Heç zaman pisliyə pisliklə cavab verməyin. Hər kəsin bir gün etdiyi yaxşı və pis əməllərin cavabını alacağını unutmayın.
Aytac
Paraqraf.com
