2026-cı ilin 5 mart tarixində Azərbaycanın ayrılmaz hissəsi olan Naxçıvan Muxtar Respublikasına pilotsuz uçuş aparatları ilə edilən hücum regionda təhlükəli bir mərhələnin başlanğıcı oldu. Hücum nəticəsində Naxçıvan Beynəlxalq Hava Limanına zərər dəydi və mülki şəxslər yaralandı. Azərbaycan rəsmiləri bu hadisəni dövlətimizin ərazisinə qarşı açıq təcavüz və terror aktı kimi qiymətləndirdi.
Bu hücum təkcə Azərbaycanın suverenliyinə deyil, həm də beynəlxalq hüququn əsas prinsiplərinə qarşı kobud hörmətsizlikdir. Bir dövlətin başqa bir dövlətin mülki infrastrukturunu – hava limanını və məktəb ətrafını – hədəf alması heç bir halda qəbul edilə bilməz. Belə addım regionda sabitliyi pozur və təhlükəli qarşıdurma riskini artırır.
Azərbaycanın mövqeyi isə hər zaman açıq və aydın olub. Rəsmi Bakı dəfələrlə bəyan edib ki, ölkə ərazisi heç bir dövlətə qarşı hücum məqsədilə istifadə olunmayacaq və bütün problemlər diplomatik yollarla həll edilməlidir. Buna baxmayaraq, İran tərəfindən həyata keçirilən bu addım qonşuluq münasibətlərinə və qarşılıqlı hörmət prinsipinə ciddi zərbə vurur.
Lakin bir həqiqət var: Azərbaycan müstəqil və güclü dövlətdir. Ölkənin ərazi bütövlüyü və vətəndaşlarının təhlükəsizliyi hər şeydən üstündür. Hər hansı təcavüz cavabsız qalmayacaq. Dövlətin müdafiə və təhlükəsizlik strukturları ölkənin suverenliyini qorumaq üçün bütün zəruri addımları atmaq gücünə malikdir.
İran rəhbərliyi anlamalıdır ki, qorxu yaratmaq və təzyiq göstərmək siyasəti Azərbaycan kimi qətiyyətli dövlət qarşısında nəticə verməz. Əksinə, belə addımlar yalnız regionda İranın nüfuzunu daha da zədələyir və onu beynəlxalq tənqid hədəfinə çevirir.
Azərbaycan sülh tərəfdarıdır, amma zəif deyil. Əgər kimsə bu ölkənin sərhədlərini və təhlükəsizliyini sınamaq istəyirsə, bilməlidir ki, Azərbaycan öz torpağını qorumağı bacaran dövlətdir və bu cür hücumlara qarşı qəti və sərt cavab vermək haqqına sahibdir.
Həsən Təbriz
Paraqraf.com
