Müəllimlik bitərsə, kainat bir heç olar.
Cəmiyyətin inkişafının əsasında dayanan ən vacib sütunlardan biri müəllimlikdir. Müəllim yalnız bilik verən şəxs deyil, o həm də gələcək nəsillərin dünyagörüşünü formalaşdıran, cəmiyyətin mənəvi və intellektual inkişafına istiqamət verən bir missiyanın daşıyıcısıdır. Bu səbəbdən müəllimə qarşı hər hansı hörmətsizlik və ya zorakılıq təkcə bir insana deyil, bütövlükdə cəmiyyətin gələcəyinə yönəlmiş təhlükə kimi qiymətləndirilməlidir.
Son dövrlərdə müəllimlərin təhlükəsizliyi və nüfuzu ilə bağlı baş verən hadisələr ictimai narahatlıq yaradır. Azərbaycanda bir müəllimin cərimələnməsi ilə bağlı qərar geniş müzakirələrə səbəb olur. Bu məsələ cəmiyyətdə müəllim nüfuzunun qorunması, onların fəaliyyətinə münasibət və yanaşma ilə bağlı suallar doğurur.
Digər tərəfdən isə, Türkiyədə daha ağır və faciəvi hadisə baş verir. Dərəçili liseyində müəllimin qətlə yetirilməsi təhsil ictimaiyyətində dərin sarsıntı yaradır. Təhsil ocağında baş verən belə hadisə məktəbin yalnız bilik məkanı deyil, həm də təhlükəsizlik və etimad mühiti olması zərurətini bir daha gündəmə gətirir.
Bu kimi hadisələr müəllim peşəsinin nə qədər həssas və eyni zamanda məsuliyyətli olduğunu göstərir. Müəllim cəmiyyətin gələcəyini yetişdirən şəxsdir. Onun nüfuzu və təhlükəsizliyi qorunmadıqda isə bu, təhsilin keyfiyyətinə və bütövlükdə cəmiyyətin inkişafına mənfi təsir göstərir.
Tarix boyu bütün böyük sivilizasiyalar müəllimə yüksək qiymət verir. Çünki müəllim təkcə bir fənni öyrətmir, o düşünməyi, dəyərləri və insan olmağın mənasını öyrədir. Bir cəmiyyət müəllimini itirərsə, əslində gələcəyini itirir.
Məhz buna görə də “müəllimlik bitərsə, kainat bir heç olar” fikri sadə bir ifadə deyil, dərin məna daşıyan həqiqətdir. Müəllimlərə hörmət, onların əməyinin qiymətləndirilməsi və təhlükəsizliyinin təmin edilməsi hər bir cəmiyyətin prioritet məsələsi olmalıdır. Çünki müəllimin olduğu yerdə bilik var, bilik olan yerdə isə gələcək var.
Rəvənə Məmmədqızı
Paraqraf.com
