İlahiyyatçı Hacı Təyyar Hüseynli Ramazan ayında təşkil olunan iftar süfrələri ilə bağlı diqqətçəkən açıqlama verib. O, xüsusilə israfçılıq xarakteri daşıyan və ehtiyacdan artıq təşkil olunan dəbdəbəli süfrələrin dini baxımdan doğru olmadığını bildirib. Onun sözlərinə görə, Ramazan ayının mahiyyəti təvazökarlıq, paylaşmaq və ehtiyac sahiblərini düşünməkdir.
Maraqlıdır, Ramazan ayında qurulan dəbdəbəli və israfla müşayiət olunan iftar süfrələri günah sayılırmı?
İlahiyyatçı Tural İrfan “Paraqraf.com”a bildirib ki, Ramazan ticarət ayı deyil, səxavət ayıdır:
“Bu ayda mümkün qədər imkanlı adamlar imkansızlara maddi və mənəvi dəstək ola bilərlər. Bəzən iftar süfrəsini israf süfrəsinə çevirirlər. Təvazökarlıq və pəhrizkarlıq ayını yemək və bordaq ayına çevirmək əsla dinin həssas, nəcib mahiyyətinə uyğun deyil. Ramazanda təmtəraqlı süfrələr açıb adını iftar qoyurlar. Kasıb və miskin adamları deyil, tox və varlı adamları da çağırıb qonaqlıq verirlər. Qətiyyən belə şeylər yolverilməzdir. Sadə, şöhrətdən uzaq süfrələr açılmalı, əsasən də oruc tutsa da, tutmasa da, imkansız adamları dəvət etmək lazımdır. Cürbəcür yeməklərlə zəngin süfrələr açıb imkanlı adamları da yığıb bordaq etmək vəhşilikdir. Bu normal insana xas davranış deyil. Belə şeyləri dinlə əlaqələndirmək də dinə qarşı təhqirdir”.
Kəmalə Vəliyeva
Paraqraf.com
