21 fevral 2026-cı il tarixində Dərya Group tərəfindən Azərbaycan Texniki Universitetində “Təhsildə İnkişaf Forumu” təşkil olunub. Tədbir təhsil sahəsində müasir çağırışların müzakirəsi, müəllimlərin cəmiyyətdə rolu və gənc nəslin inkişaf istiqamətlərinin müəyyənləşdirilməsi məqsədi daşıyıb.
Forumun açılış mərasimində Dərya Group-un icraçı direktoru Həsən Məmmədov çıxış edərək tədbirin əhəmiyyətindən və əsas hədəflərindən bəhs edib. O, qeyd edib ki, belə platformalar təhsil ictimaiyyətinin bir araya gəlməsi, fikir mübadiləsi aparması və yeni təşəbbüslərin formalaşması baxımından xüsusi önəm daşıyır.
Tədbirdə ikinci çıxış Dərya Groupun təsisçisi və rəhbəri Aytac Məhərrəmova tərəfindən edilib. O, rəhbərlik etdiyi qurumun təhsilə verdiyi dəstəkdən, maarifləndirici layihələrin davamlılığından və gələcək planlardan danışaraq forumun uzunmüddətli əməkdaşlıqlar üçün zəmin yaratdığını vurğulayıb.
Panel hissəsində çıxış edənlər müxtəlif sahələr üzrə təcrübə və baxışlarını bölüşüblər. Akademik Misir Mərdanov müəllimin cəmiyyətin intellektual dayağı olduğunu vurğulayaraq təhsilin strateji rolundan danışıb. Uzman klinik psixoloq Narınc Rüstəmova rəqəmsal dövrdə uşaqların psixoloji sağlamlığı, sosial media və texnologiyanın təsirləri barədə geniş məlumat verib, praktik tövsiyələrini iştirakçılarla bölüşüb. Sənətşünaslıq üzrə fəlsəfə doktoru Bəhruz Niftəliyev isə müəllimlər üçün effektiv nitq və təsir bacarıqlarının əhəmiyyətini önə çəkib.
Forumda təhsil və ictimai fəaliyyət sahəsində tanınan mütəxəssislər – Elmin Nuri, Əmrah Həsənli, Bənövşə Məmmədova, Almaz Həsrət, Mələkxanım Yusifli və Suğra Quliyeva da iştirak ediblər.
Tədbirin bədii hissəsi də maraqla qarşılanıb. İfaçılar Rövik Səfərov və Fatimə Məmmədli səhnədə çıxış ediblər. Həmçinin bacı-qardaş duet Fərman və Günəş musiqi nömrələri ilə iştirakçılara xoş ovqat bəxş ediblər.
Tədbirin yekununda jurnalist, Paraqraf.com saytının təsisçisi Türkan Səfərova forumun əhəmiyyətini vurğulayaraq belə təşəbbüslərin təhsil ictimaiyyətinin inkişafına töhfə verdiyini bildirib. Sonda Dərya Group-un icraçı direktoru Həsən Məmmədov yekun nitqi ilə tədbiri bağlayıb, iştirakçılara təşəkkürünü bildirib və forumun davamlı xarakter daşıyacağını qeyd edib.
Forumun sonunda iştirakçılara sertifikatlar təqdim olunub və xatirə şəkilləri çəkilib. Tədbir iştirakçılar tərəfindən böyük maraqla qarşılanıb. Təhsil ictimaiyyəti tərəfindən maraqla qarşılanan forumun gələcəkdə də davamlı şəkildə təşkili planlaşdırılır.
Həsən Məmmədov
Paraqraf.com
