English Academy Beynəlxalq Dil Mərkəzi və Yasamal Rayon M.Ş.Vazeh adına Mərkəzi Kitabxana Beynəlxalq Kitab Gününü qeyd etdi

14 fevral tarixində English Academy Beynəlxalq Dil Mərkəzinin və Yasamal Rayon M.Ş.Vazeh adına Mərkəzi Kitabxananın birgə təşkilatçılığı ilə Beynəlxalq Kitab Gününə həsr olunmuş maarifləndirici tədbir keçirildi. Tədbirin əsas məqsədi gənc nəslin mütaliəyə marağını artırmaq, kitabın insanın intellektual və mənəvi inkişafındakı rolunu vurğulamaq idi.

Paraqraf.com xəbər verir ki, tədbirdə English Academy Beynəlxalq Dil Mərkəzinin rəhbəri Maya xanım çıxış edərək kitab oxumağın dil bacarıqlarının formalaşmasında, dünyagörüşünün genişlənməsində və şəxsiyyətin inkişafında mühüm əhəmiyyət daşıdığını qeyd etdi. O, tələbələrə mütaliənin sadəcə bir vərdiş deyil, həyat tərzi olduğunu vurğuladı və iştirakçılara kitablar hədiyyə etdi.

Birgə əməkdaşlıq çərçivəsində tədbirdə iştirak edən Lalə xanım və Yeganə xanım da çıxış edərək müasir dövrdə gənclərin kitaba marağının qorunmasının vacibliyindən danışdılar. Onlar kitabxana və təhsil müəssisələrinin birgə fəaliyyətinin oxu mədəniyyətinin inkişafında mühüm rol oynadığını qeyd etdilər.

Tədbir iştirakçıların sualları, fikir mübadiləsi və səmimi müzakirələrlə davam etdi. Sonda xatirə şəkilləri çəkildi və gələcəkdə bu kimi layihələrin davam etdiriləcəyi bildirildi.

Paraqraf.com