Son aylarda dünya bazarlarında kərə yağının qiymətində kəskin ucuzlaşma müşahidə olunsa da, bu tendensiya Azərbaycan bazarında əks istiqamətdə özünü göstərir. Qlobal miqyasda qiymətlər 44 faiz azaldığı halda, ölkədə kərə yağı bahalaşmaqda davam edir. Statistik göstəricilər və idxal rəqəmləri bu ziddiyyətli mənzərəni daha da diqqətçəkən edir və sual yaradır: dünya bazarlarında ucuzlaşma gedirsə, Azərbaycanda kərə yağı niyə bahalaşır?
Mövzu ilə bağlı iqtisadçı-ekspert, Liberal İqtisadçılar Mərkəzinin sədri Akif Nəsirli Paraqraf.com-a açıqlamasında bildirib ki, dünyada kərə yağının qiyməti kəskin ucuzlaşsa da, bunun Azərbaycanda hiss olunmamasının əsas səbəblərindən biri idxal və pərakəndə satış bazarında inhisarçılığın güclü olmasıdır:
“Kərə yağının idxalı əsasən az sayda şirkətin nəzarətindədir və bu şirkətlər məhsulun bazara hansı qiymətlə çıxacağını faktiki olaraq özləri müəyyən edirlər. Rəqabət zəif olduğu üçün dünya bazarındakı 44 faizlik ucuzlaşma daxili bazara ötürülmür.
Digər tərəfdən, iri supermarket şəbəkələri də bazarda dominant mövqeyə malikdir. Kiçik mağazalar bu şəbəkələrlə qiymət baxımından rəqabət apara bilmir. Supermarketlər yüksək ticarət əlavələri tətbiq edir və alternativ satış kanallarının azlığı istehlakçının seçim imkanlarını məhdudlaşdırır. Nəticədə alıcı ya baha qiymətlə razılaşmalı olur, ya da ümumiyyətlə məhsuldan imtina edir.
Bundan əlavə, bazarda şəffaflığın aşağı olması qiymətlərin süni şəkildə yüksək saxlanmasına şərait yaradır. İdxal dəyəri təxminən 12 manat olan məhsulun mağazalarda 24–25 manata satılması iqtisadi baxımdan izaholunan deyil və bu, daha çox inhisarçı davranışdan xəbər verir. Nəticədə dünya bazarlarında ucuzlaşma baş versə də, bundan nə istehlakçı faydalanır, nə də bazarda sağlam qiymət formalaşır”.
Ləman
Paraqraf.com
