Əfqanıstanda yeni Cinayət Məcəlləsi ilə bağlı cəza siyahısı yayılıb

Sosial şəbəkələrdə Əfqanıstanda tətbiq edildiyi iddia olunan yeni Cinayət Məcəlləsinə dair cəza siyahısı yayılıb. Paylaşılan məlumatlara görə, sənəddə bir sıra əməllər üçün sərt cəzalar nəzərdə tutulur.

İddialara əsasən, heyvanları bir-biri ilə döyüşdürməyə məcbur edən şəxslər 5 ay müddətinə azadlıqdan məhrum edilə bilər. Silah qaçaqçılığına görə 1 il həbs cəzası nəzərdə tutulur. Eyni cinsli münasibətlərə görə ilk dəfə 2 il həbs, təkrar halında isə ölüm cəzası tətbiq oluna bilər.

Paraqraf.com xəbər verir ki, iddialara əsasən siyahıda həmçinin yalan şahidlik edənlər üçün 40 şallaq, rüşvət verən və alan şəxslər üçün 2 il həbs, rüşvətə vasitəçilik edənlər üçün isə 6 ay həbs cəzası yer alır. Narkotik maddələrin satışı 5 il, adam qaçırma isə 10 il həbs ilə cəzalandırıla bilər.

İddialara görə, oruc tutmayanlara 20 şallaq və 2 ay həbs, müsəlmanlara qarşı hörmətsizlik edənlərə 40 şallaq, döymə edənlərə 15 gün həbs cəzası tətbiq olunur. Müəllimin tələbəni döyməsi vəzifədən uzaqlaşdırma ilə nəticələnə bilər.

Peyğəmbərə (s.a.v.) hörmətsizlik edən şəxslərin tövbə etmədiyi halda ölüm cəzası ilə üzləşə biləcəyi də qeyd olunur. Qumar oynamaq, rəqs etmək və ya izləmək, qeyri-məhrəm şəxslərə toxunmaq kimi əməllər üçün də müxtəlif müddətli həbs cəzaları göstərilir.

Qeyd edək ki, yayılan bu siyahı ilə bağlı Əfqanıstanın rəsmi qurumları tərəfindən hələlik təsdiqlənmiş açıqlama verilməyib.

Paraqraf.com