Prezident İlham Əliyevin təsdiqlədiyi “Azərbaycan Mədəniyyəti – 2040” Mədəniyyət Konsepsiyasında 2026-2030-cu illər ərzində mədəniyyətin təhsilin tərkib hissəsinə çevrilməsi, o cümlədən mədəniyyət sahələrinə və Azərbaycanın mədəni dəyərlərinə dair fənn və biliklərin tədrisinin təmin edilməsi nəzərdə tutulur.
Bəs yeni fənlə bağlı daha nələri bilməliyik? Hansı zərurətdən yaranıb? Hansı ixtisası bitirən müəllimlər onu tədris edəcək?
Dosent İlham Əhmədov mövzu ilə bağlı Musavat.com-a fikrini bölüşüb:
“Azərbaycan Mədəniyyəti – 2040” Konsepsiyası yalnız mədəni inkişaf sənədi deyil, milli kimlik, təhsil və uzunmüddətli inkişaf üçün strateji yol xəritəsidir. Sənədin əsas məqsədi mədəniyyəti təkcə estetik sahə kimi deyil, insan kapitalının formalaşmasında, milli identikliyin möhkəmləndirilməsində və dayanıqlı inkişafda əsas amil kimi təqdim etməkdir: “Konsepsiya mədəniyyətin təhsil, elm, texnologiya və yaradıcı iqtisadiyyatla inteqrasiyasını nəzərdə tutur. Xüsusilə 2026–2030-cu illərdə mədəniyyətin təhsilin tərkib hissəsinə çevrilməsi prioritet kimi müəyyən edilib. Bu mərhələdə Azərbaycan mədəni irsi, tarixi-mədəni dəyərlər, ədəbiyyat, musiqi, folklor və incəsənət üzrə fənn və modul proqramlarının formal və qeyri-formal təhsilə sistemli şəkildə daxil edilməsi planlaşdırılır. Tədris yalnız məlumatverici deyil, dəyəryönlü və tənqidi düşüncəni inkişaf etdirən məzmunda olacaq.
Sənəddə mədəniyyətin sosial həmrəylik, vətəndaş şüuru, estetik zövq və mənəvi dəyərlərin formalaşmasında rolu vurğulanır. Rəqəmsal dövrün tələblərinə uyğun olaraq mədəniyyətə dair biliklərin interaktiv və rəqəmsal platformalar vasitəsilə tədrisi də nəzərdə tutulur.
Konsepsiyada mədəniyyət üzrə kadr potensialının inkişafı xüsusi yer tutur. Müəllimlərin və mütəxəssislərin hazırlanması, ixtisasartırma mexanizmlərinin gücləndirilməsi vacib şərt kimi göstərilir. Gözlənilən nəticə mədəni cəhətdən savadlı, milli kimliyinə bağlı və qlobal dünyaya açıq insan kapitalının formalaşmasıdır.
Dosent vurğulayır ki, Konsepsiyanın qəbulu ilk addımdır: “Əsas məsələ onun peşəkar şəkildə icrası, elmi-metodik təminatın yaradılması, kadr hazırlığı, şəffaflıq və ictimai nəzarətin təmin edilməsidir. Yeni mədəniyyətyönlü fənn kurikulumlarının hazırlanması və müəllimlərin xüsusi hazırlığı zəruridir. Bu sənədə həm də gələcəkdə Elm və Təhsil Nazirliyi ilə Mədəniyyət Nazirliyi arasında mümkün inteqrasiyaya hazırlıq platforması kimi baxmaq olar”.
Afaq Mirayiq
