Dərya Group tərəfindən təşkil olunan “Peşəkar müəllim inkişafı üçün strategiyalar” mövzusunda onlayn vebinar 26 dekabr 2025-ci il tarixində Zoom platforması üzərindən baş tutub. Vebinar təhsil sahəsində çalışan müəllimlər, təhsil mütəxəssisləri və bu sahəyə maraq göstərən iştirakçılar üçün nəzərdə tutulub.
Tədbirin əsas məqsədi müəllimlərin peşəkar inkişafı, müasir təhsil çağırışları və bu istiqamətdə tətbiq edilə bilən strateji yanaşmalar barədə fikir mübadiləsi aparmaq olub. Vebinarda peşəkar müəllim modelinin formalaşdırılması, davamlı inkişafın əhəmiyyəti, rəqəmsallaşmanın təhsilə təsiri və müəllimlərin cəmiyyətdə rolu kimi mövzular müzakirə edilib.
Vebinarın əsas məruzəçisi Milli Məclisin deputatı Ceyhun Məmmədov olub. O, çıxışında müəllim peşəsinin cəmiyyət üçün strateji əhəmiyyətini vurğulayaraq, müəllimlərin bilik və bacarıqlarının artırılmasının ölkənin gələcək inkişafında mühüm rol oynadığını qeyd edib. Deputat həmçinin müəllimlərin motivasiyası, peşəkar inkişaf imkanlarının genişləndirilməsi və təhsil sistemində keyfiyyətin artırılması ilə bağlı fikirlərini bölüşüb.
Tədbir moderator tərəfindən idarə olunub və interaktiv formatda keçirilib. Vebinarın sonunda iştirakçıların sualları cavablandırılıb, mövzu ətrafında açıq müzakirələr aparılıb.
Qeyd edək ki, vebinarda iştirak ödənişsiz olub və tədbir sonunda iştirakçılara rəsmi sertifikat təqdim olunacağı bildirilib.
Aytac Məhərrəmova
Paraqraf.com
