17 dekabr 2025-ci il tarixində Bakı şəhərində, Hilton Hotelin Ametist zalında “Uşaq hüquqları: mediada həssas yanaşma” mövzusunda tədbir keçirilib. Tədbir Azərbaycan Respublikasının Ailə, Qadın və Uşaq Problemləri üzrə Dövlət Komitəsinin təşkilatçılığı ilə baş tutub.
Tədbirin məqsədi media nümayəndələrinin uşaq hüquqları sahəsində məlumatlılığının artırılması, uşaqlarla bağlı mövzuların işıqlandırılmasında etik və uşağayönümlü yanaşmanın təşviqi, eləcə də zərərli informasiyadan qorunma mexanizmlərinin müzakirəsi olub.
Tədbir iştirakçıların qeydiyyatı ilə başlayıb, açılış nitqi ilə Ailə, Qadın və Uşaq Problemləri üzrə Dövlət Komitəsinin Analitik təhlil və informasiya təminatı şöbəsinin müdiri Elgün Səfərov çıxış edib. O, uşaq hüquqlarının qorunmasında medianın rolunu vurğulayıb və bu sahədə məsuliyyətli yanaşmanın vacibliyini qeyd edib.
Daha sonra “Ümidli Gələcək” Sosial Təşəbbüslər İctimai Birliyinin icraçı direktoru Kəmalə Aşumova “Uşaq hüquqları: mediada uşağayönümlü yanaşma və zərərli informasiyadan qorunma” mövzusunda təqdimatla çıxış edib. Təqdimatda uşaqların informasiya mühitində üzləşdiyi risklər və media subyektlərinin bu sahədə üzərinə düşən vəzifələr diqqətə çatdırılıb.
Tədbirin növbəti hissəsində Azərbaycan Televiziyasının Teleradio Akademiyasının rektoru, Media və İnformasiya Savadlılığı Mərkəzinin rəhbəri Almaz Mahmud “Uşaq hüquqları: ənənəvi və rəqəmsal medianın müsbət və mənfi tərəfləri” mövzusunda çıxış edərək, rəqəmsal platformaların yaratdığı imkanlar və çağırışlar barədə ətraflı məlumat verib.
Tədbir çərçivəsində media və vətəndaş cəmiyyəti nümayəndələri arasında fikir mübadiləsi aparılıb, suallar cavablandırılıb və praktiki tövsiyələr səsləndirilib.
Sonda iştirakçılar üçün nahar təşkil olunub.
Həsən
Paraqraf.com
