Məsafədən (distant) işləmək qanuniləşir.
Bu məsələyə dair təklif Milli Məclisin Regional məsələlər komitəsinin bu gün keçirilən iclasında müzakirəyə çıxarılan Əmək Məcəlləsinə dəyişiklik layihəsində öz əksini tapıb.
İnsan resursları üzrə mütəxəssis və təlimçi Nigar Temrazova “Paraqraf.com”a bildirib ki, Əmək Məcəlləsinə təklif edilən dəyişikliklər çərçivəsində məsafədən işləməyin rəsmiləşdirilməsi ölkəmizdə yeni əmək münasibətlərinin formalaşmasına şərait yarada bilər:
“Bu iş modeli ilə bağlı qərar rəsmiləşdiyi halda həm işəgötürənlər, həm də əməkdaşlar üçün bir sıra üstünlüklər və çağırışlar ortaya çıxacaq.
Distant işin bir sıra müsbət tərəfləri var:
Zamanın səmərəli istifadəsi:
Distant iş rejimində əməkdaşların gündəlik yola sərf etdiyi vaxt aradan qalxır. Bu isə həm şəxsi inkişaf, həm də ailə üçün daha çox zaman ayırmağa imkan verir.
Xərclərin optimallaşdırılması:
Evdən işləyən şəxslərin nəqliyyat, yemək və digər gündəlik xərcləri azalır. Eyni zamanda işəgötürənlər üçün ofis saxlanması, kommunal və inzibati xərclər də minimuma enir.
Daha rahat iş mühiti:
İnsanlar özlərinə uyğun komfortlu iş şəraiti yaratdıqları üçün stress səviyyəsi azalır, işə fokuslanmaq daha asan olur.
Daha geniş bazaya çıxış:
Distant iş modeli şirkətlərə yalnız paytaxtdan deyil, regionlardan, hətta digər ölkələrdən mütəxəssisləri cəlb etmək imkanı yaradır. Bu da komandanın daha peşəkar formalaşmasına müsbət təsir göstərir”.
Nigar Temrazova, həmçinin distant işin mənfi tərəflərindən də danışıb:
“Özünüidarəetmə çətinlikləri:
Hər kəs ev şəraitində eyni dərəcədə intizamlı ola bilmir. Müşahidə və nəzarətin azalması bəzi əməkdaşlarda motivasiya düşməsinə səbəb ola bilər.
Komanda dinamikasının zəifləməsi:
Canlı ünsiyyətin azalması nəticəsində komanda ruhu zəifləyə və əməkdaşlıq qabiliyyətində müəyyən boşluqlar yarana bilər.
İş və şəxsi həyat sərhədlərinin qarışması:
Evdən işləyən şəxslər bəzən işdən tam ayrılmaqda çətinlik çəkirlər və nəticədə əlavə psixoloji yüklənmə yarana bilər.
Texniki risklər və təhlükəsizlik məsələləri:
İnternet əlaqəsi və avadanlıq problemləri iş prosesinə təsir edə bilər. Bundan əlavə, məlumat təhlükəsizliyi və kibermüdafiə məsələləri daha da aktuallaşır.
Performansın ölçülməsi çətinliyi:
Distant rejimdə əməkdaşların fəaliyyətini obyektiv qiymətləndirmək üçün daha mütəşəkkil sistemlərə ehtiyac yaranır.
Distant iş modeli düzgün tətbiq olunduqda əmək münasibətlərinin çevikliyini artırır, şirkətlərə daha geniş imkanlar yaradır və işçilərin rifahına müsbət təsir göstərir. Lakin bu modelin uğurlu tətbiqi üçün həm idarəetmə mexanizmləri, həm də daxili kommunikasiya prosesləri gücləndirilməlidir”.
Kəmalə Vəliyeva
Paraqraf.com
