“Quş qripi virusu COVID-19-dan daha təhlükəli pandemiyaya gətirib çıxara bilər”.
Paraqraf.com “Reuters” agentliyinə istinadla xəbər verir ki, bunu Paster İnstitutunun (Fransa) Tənəffüs Yollarının İnfeksiyaları Mərkəzinin direktoru Mari-Ann Ramey-Velti bəyan edib.
O bildirib ki, H5 kimi tanınan yüksək patogenli quş qripi virusu son illərdə yüz milyonlarla quşun kütləvi məhvinə, ərzaq təchizatı zəncirlərinin pozulmasına və qiymətlərin artmasına gətirib çıxarıb. Amma insanların yoluxmasına nadir hallarda təsadüf edilir. Alim qeyd edib ki, təhlükə virusun məməlilərə və insanlara uyğunlaşmasında və insandan insana yoluxma qabiliyyətinin qazanılmasındadır. Əgər bu baş verərsə, pandemiya real ola bilər.
Ramey-Velti vurğulayıb ki, necə ki, COVID-19 pandemiyasının əvvəlində insanlarda ona qarşı anticisimlər yox idi, eləcə də H5 virusuna qarşı anticisimlər yoxdur. Əsasən insanların həssas qruplarını zədələyən koronavirusdan fərqli olaraq, qrip virusları sağlam insanlara, o cümlədən uşaqlara zərər verə bilər. Onun fikrincə, quş qripi pandemiyası COVID-19 pandemiyasından daha ağır ola bilər.
İnsanlarda H5 viruslarına, habelə ABŞ-də ev quşları və qaramal arasında H5N1-ə yoluxma halları artıq qeydə alınıb. Bu ilin noyabrında Vaşinqton ştatında insanın ilk dəfə H5N1-ə yoluxması faktı aşkarlanıb: kişini xilas etmək mümkün olmayıb.
Ramey-Velti əlavə edib ki, əgər quş qripi virusu mutasiyaya uğrayaraq insandan insana ötürülərsə, dünya bu təhdidə COVID-19-dan daha yaxşı hazırlanıb. Onun sözlərinə görə, artıq peyvənd üçün namizədlər, virus əleyhinə dərman ehtiyatları və kütləvi istehsal texnologiyaları mövcuddur ki, bu da infeksiya ocaqlarını operativ şəkildə məhdudlaşdırmağa imkan verəcək.
Ümumdünya Heyvan Sağlamlığı Təşkilatının elmi şöbəsinin rəhbəri Qreqorio Torres qeyd edib ki, insanlar arasında qlobal pandemiya riski aşağı olaraq qalır. O vurğulayıb ki, hələlik narahatlığa səbəb yoxdur, insanlar təbiətdə rahat dolaşa, toyuq əti və yumurta istehlak edə bilərlər.
Paraqraf.com
