“Türkiyə və Azərbaycan xəbər agentlikləri arasında əlaqələr hər ötən gün daha da inkişaf edir. Bu məsələlərdə Trend Beynəlxalq İnformasiya Agentliyinin çox önəmli bir payı var”.
Bunu Türkiyənin Azərbaycandakı səfirliyinin mətbuat müşaviri Alptekin Cihangir İşbilir Türk Dövlətləri Təşkilatının Media Forumu çərçivəsində baş tutan “Rəqəmsal media mühitində TDT-yə üzv dövlətlərin qarşılıqlı əməkdaşlıq imkanları” mövzusuna həsr olunan ikinci panel sessiyada çıxışı zamanı deyib.
Media eksperti Hacıbəy Heydərli “Paraqraf.com”a bildirib ki, Türkiyə və Azərbaycan qədər bir-birinə yaxın ikinci dövlət tapmaq çətindir:
“Çünki Azərbaycan və Türkiyənin dostluğu uzun illərə və əsrlərə söykənir. Azərbaycan və Türkiyə arasında bütün sahələrdə münasibətlər ən yüksək səviyyədədir. Media sahəsində də əlaqələri inkişaf edir. Hər iki ölkənin mediaları bütün məsələlərdə eyni mövqedən çıxış edir”.
Ekspertin sözlərinə görə, Azərbaycan və Türkiyə arasında media sahəsi üzrə əməkdaşlıq daha da artırılmalıdır:
“Çünki Türkiyənin daxilində də bəzi qüvvələr var ki, Azərbaycana qarşı ikili mövqedən çıxış edir. Bəzi radikal, solçu qüvvələr mütəmadi olaraq azərbaycanlılar haqqında saxta məlumatlar yayır. Belə olan təqdirdə bu sahə üzrə əlaqələr güclənməlidir. Türkiyə mediası da Azərbaycan mediasından istinad mənbəsi kimi istifadə etməlidir. Azərbaycanın bir çox media qurumlarının Türkiyə ilə əlaqələri var, həmçinin Türkiyənin də media qurumlarının Azərbaycanla əlaqələri mövcuddur. Azərbaycan jurnalistləri çalışmalıdırlar ki, Türkiyə mediası ilə daha sıx işləsinlər”.
Kəmalə Vəliyeva
Paraqraf.com
