“Tramp Yolu”nun (Zəngəzur dəhlizi) tikintisinə 2026-cı ilin ikinci yarısında başlanacaq”.
Bunu Ermənistanın Baş naziri Nikol Paşinyan parlamentdə hökumət saatı zamanı elan edib.
Onun sözlərinə görə, bütün detallar bu ilin sonuna qədər müzakirə olunmalı, bütün plan ilin birinci yarısında kağız üzərində təqdim olunmalıdır. Tikinti işlərinə ikinci yarısında başlamaq planlaşdırılır.
“Amma mən hələlik bu barədə danışmaq istəmirdim, çünki bu cür planlar həmişə cədvəldən kənara çıxır”, – deyə Paşinyan bildirib.
Milli Məclisin deputatı Naqif Həmzəyev “Paraqraf.com”a açıqlamasında bildirib ki, Azərbaycan torpaqlarını işğaldan azad etdikdən sonra sülh gündəliyinə önəm verdi:
“İlk başlarda Ermənistan tərəfi sülhə əməl etməsə də, sonradan Azərbaycanın uğurlu tədbirləri nəticəsində Ermənistan da bu reallıqları qəbul etdi. Vaşinqton razılaşmalarından sonra tərəflər sülhə daha da yaxınlaşdılar. Zəngəzur dəhlizinin istifadəyə verilməsi üçün sənəd üzərində əksər işlər görülüb. Bu dəhlizin Ermənistan ərazisindən keçən hissəsinin hazırlanması ilə əlaqədar Ermənistan və ABŞ arasında razılaşma var. İlk növbədə Azərbaycan həm Qaradənizə, həm də Türkiyə üzərindən Aralıq dənizi və Avropaya çıxışı var. Azərbaycan Orta dəhlizin vacib komponentidir, lakin Orta dəhlizə olan maraq o qədər yüksəkdir ki, yüklərin daşınması üçün yolların şaxələndirilməsi vacibdir. Bu mənadan da Zəngəzur dəhlizinin (Tramp yolunun) açılması yükdaşıma həcmini artıracaq. Uzun illərdir ki, Azərbaycanın həyata keçirdiyi nəqliyyat şəbəkəsinin daha genişlənməsinə xidmət etmiş olacaq”.
Deputat əlavə edib ki, Zəngəzur dəhlizinin istifadəyə verilməsi yalnız Azərbaycanın maraqlarına xidmət etmir, həm Ermənistanın, həm Türkiyənin, həm də Rusiyanın maraqlarına uyğun layihədir:
“Nəticə etibarilə bu xətdən istifadə edərək daha sürətli və təhlükəsiz yükdaşımalar həyata keçiriləcək. Bu baxımdan da Ermənistanda planlaşdırılan parlament seçkiləri baş tutduqdan sonra bu prosesə Ermənistan tərəfi start verəcək. Eyni zamanda Azərbaycan İran ərazisindən keçməklə İran Azərbaycanın Qərb ərazisini, yəni Zəngilanı, Naxçıvanı birləşdirəcək iki körpü də yaxın dövrdə istifadəyə hazır olacaq. Azərbaycan yaxın 10 ildə regionun ən böyük nəqliyyat infrastrukturuna malik olan və nəqliyyat şəbəkəsini formalaşdıran dövlətə çevriləcəkdir. Azərbaycan üçün Zəngəzur dəhlizinin açılması çox vacibdir”.
Kəmalə Vəliyeva
Paraqraf.com
