Bakıətrafı qəsəbələrdə mənzillərin qiyməti ucuzlaşıb. Eləcə də bazara çıxarılan mənzillərin sayı artıb. Bu hal əsasən Xırdalan, Masazır və Binə qəsəbələrində daha qabarıq şəkildə müşahidə olunur. Zabrat qəsəbəsində, eləcə də Kürdəxanı və Pirşağı kəndlərində həyət evlərinin qiymətində oxşar vəziyyət yaranıb.
Mövzu ilə bağlı əmlak eksperti Elnur Azadov “Paraqraf.com”a açıqlamasında bildirib ki, Xırdalan və Masazırda təklif çox olduğuna görə rəqabət də güclüdür:
“Bu baxımdan, qiymətlər son 4-5 il ərzində həmin yerlərdə az artıb. Qiymətlər stabildir. Bəzi təcili satışlar zamanı evlər daha ucuz qiymətə satılır. Zabrat da sıx məskunlaşmış ərazidir və orada da oxşar vəziyyət müşahidə olunur. Pirşağı qəsəbəsində isə evlərin qiyməti aşağı düşməyib, çünki ‘Sea Breeze’ layihəsinin davamı həmin əraziyə təsadüf edir. Tələb çox olduqda evlərin qiyməti də yüksək olur”.
Kəmalə Vəliyeva
Paraqraf.com
