Ədəbi məclis iki həftədən bir kitabxanada şair və yazıçılar üçün keçirilən mənəvi görüş yeridir. Bu məclisin əsas faydası insanları bir araya gətirməsi, onların öz yaradıcılığını – hekayə və şeirlərini – paylaşmasına şərait yaratmasıdır. Hər bir yazar bu məclisdə öz sevgisini, hisslərini, həyat baxışını sözlə ifadə edir, dinləyicilər isə həmin əsərləri dinləyərək səmimi fikirlərini bölüşürlər.
Bu ədəbi mühitdə 18 yaşından 80 yaşına qədər olan müxtəlif nəsillərin nümayəndələri iştirak edir. Onların bəziləri artıq kitab müəllifləridir. Mən bu yazıçıları dinlədikcə çox düşündüm. Onların söylədiyi hər bir şeir, hər bir fikir qəlbimə toxundu, ruhumu zənginləşdirdi. Çünki hər bir yazarın sözündə onun məhəbbəti, ədalət duyğusu və həyat təcrübəsi əks olunur.
Belə ədəbi məclislərin sayının artırılması çox vacibdir. Onlara hər zaman dəstək göstərilməli, rayonlarda nəşriyyatlar açılmalı və bu yazarların əsərləri toplu şəklində dövlət dəstəyi ilə çap edilməlidir. Bu, yazarların ruhunu sevindirər, onlara ilham verər və yeni əsərlərin yaranmasına təkan verər.
Unutmayaq ki, bir müəllim və ya yazar bir hekayəni canlandırıb oxucuya çatdırırsa, bu, oxucu üçün böyük bir duyğudur. Çünki hər bir insanın həyatı bir hekayədir, bir kitabdır, bir nağıldır. Gəlin bu hekayələri elə yazaq ki, onlar həm insanlar, həm də cəmiyyət üçün faydalı və düşündürücü olsun.
Elçin Ağasıyev
Paraqraf.com
