Bu ilin aprel ayında Bakıda yerləşən “MedAura” Klinikasında rinoplastika əməliyyatı keçirən 34 yaşlı Nigar Budaqlı artıq altı aydır yataq xəstəsidir. Onun kritik vəziyyəti hələ də davam edir.
Sosial şəbəkələrdə yayılan məlumata görə, zərərçəkənin ailəsi əməliyyatı icra edən lor-cərrah Yaqub Əsədi və anestezioloq Cəmilə Əliyevanı təqsirkar hesab edir. Onlar iddia edirlər ki, Nigar Budaqlı əməliyyat zamanı həkimlərin səhlənkarlığı nəticəsində kliniki ölüm vəziyyətinə düşüb.
Tibb üzrə ekspert Aydın Əliyev “Paraqraf.com”a açıqlamasında bildirib ki, hadisədə həkimin də səhvi ola bilər:
“Dərmanın keyfiyyətli olub-olmaması ilə bağlı məsələ də rol oynaya bilər. Müvafiq idarələr müəyyən edə bilərlər ki, həkimin səhvi nədən ibarətdir. Xəstənin hüququ var ki, nədən narazı qalıbsa, onu bildirsin”.
Hüquqşünas Ayxan Məmmədli isə məsələ ilə bağlı bildirib ki, əgər həkimlərin səhlənkarlığı nəticəsində pasiyentin səhhətinə ağır zərər dəyibsə, bu, Cinayət Məcəlləsinin 314-cü (səhlənkarlıq) və ya 316-cı (peşə vəzifələrini lazımi qaydada yerinə yetirməmə) maddələri üzrə hüquqi məsuliyyət yarada bilər:
“Tibbi fəaliyyət nəticəsində insanın sağlamlığına ciddi zərər vurulması və ya ölümə səbəb olma hallarında cinayət işi açılır və istintaq zamanı müvafiq tibbi ekspertiza təyin edilir. Əgər ekspertiza müəyyən etsə ki, əməliyyatı icra edən həkimlər tibbi protokolları, təhlükəsizlik qaydalarını və ya peşə standartlarını pozublar, bu halda onların cinayət məsuliyyəti daşıması labüddür. Cəzanın növü törədilən əməlin ağırlıq dərəcəsindən asılı olaraq dəyişir – peşə fəaliyyətindən məhrumetmə, azadlığın məhdudlaşdırılması və ya azadlıqdan məhrumetmə kimi tədbirlər nəzərdə tutula bilər”.
Hüquqşünas əlavə edib ki, cinayət məsuliyyətindən başqa, bu cür hallarda Səhiyyə Nazirliyi və ya TƏBİB tərəfindən inzibati araşdırma da aparılır:
“Araşdırma nəticəsində həkimlərin lisenziyaları müvəqqəti və ya daimi dayandırıla bilər. Yəni səhlənkarlığı sübuta yetirilən tibb işçiləri birdəfəlik olaraq peşə fəaliyyətindən uzaqlaşdırıla bilərlər.
Xəstənin ailəsinin şikayəti əsasında məsələni hüquq-mühafizə orqanları araşdırmalıdır və obyektiv nəticə yalnız ekspertiza rəyi əsasında verilə bilər”.
Kəmalə Vəliyeva
Paraqraf.com
