Müasir dövrdə informasiya elə sürətlə yayılır ki, həqiqətlə yalan arasında sərhəd bulanıqlaşıb. Sosial media artıq sadəcə ünsiyyət vasitəsi deyil – o, düşüncələrimizi formalaşdıran, davranışlarımızı yönləndirən görünməz bir qüvvəyə çevrilib.
İndi xəbərlər rəsmi mənbələrdən çox, “status”larda, “story”lərdə, paylaşımlarda yayılır. Amma problem ondadır ki, bu paylaşımların çoxu emosiya üzərində qurulmuş manipulyasiyadır. Kiminsə məqsədi reytinq qazanmaq, kiminsə isə cəmiyyəti müəyyən fikrə yönləndirmək olur. Və insanlar, çox vaxt fərqinə varmadan, bu informasiya axınının bir hissəsinə çevrilirlər.
İnformasiya manipulyasiyası cəmiyyətin ən dərin qatlarına təsir edir — qorxu, nifrət, panika, yanlış qənaətlər yaradır. Bir saxta xəbər bir neçə saata minlərlə insanın fikrini dəyişə bilir, reallığı təhrif edir. Bu isə təkcə sosial mediada deyil, ictimai münasibətlərdə də inamsızlıq yaradır.
Bu vəziyyətdən çıxış yolu sadə, amma vacibdir: tənqidi düşünmək. Hər oxuduğuna inanmaq əvəzinə, mənbəni yoxlamaq, fərqli fikirləri dinləmək, emosiyaya deyil, məntiqə söykənmək lazımdır. İnformasiya dövründə ən böyük silah bilik yox, şüurlu seçimdir.
Sosial media bizi birləşdirə də bilər, bölə də bilər. Bu, ondan necə istifadə etdiyimizdən asılıdır. Həqiqəti qorumaq – artıq jurnalistlərin yox, hər birimizin borcudur.
M. Mehdiyeva
