Türkiyə Böyük Millət Məclisinin (TBMM) tərkibində yaradılmış Milli Həmrəylik, Qardaşlıq və Demokratiya Komissiyasının gündəliyindəki əsas suallardan biri həftələrdir gündəmdə olan, lakin hələ də qeyri-müəyyən olan PKK-nın qurucusu Abdullah Öcalanla görüş üçün İmralıya səfər edilib-edilməyəcəyi ilə bağlıdır.
Paraqraf.com xəbər verir ki, müxtəlif siyasi partiyalar Öcalanla mümkün görüşə dair açıqlamalar versə də, məsələ hələ rəsmi olaraq komissiyanın gündəliyinə daxil edilməyib.
Parlament dəhlizlərində və ya komissiya iştirakçıları arasında qeyri-rəsmi şəkildə müzakirə aparılmasına baxmayaraq, hakim partiya daxilində məsələ ilə bağlı dəqiq, yekdil fikir yoxdur.
Ancaq Prezident Rəcəb Tayyib Ərdoğanın Demokratik Xalq Partiyasının (DEM) İmralı nümayəndə heyəti ilə görüşünün “müsbət” olduğu barədə açıqlamalarından sonra Öcalanla görüşə ümidlər artıb.DEM Partiyası və Milliyyətçi Hərəkat Partiyası (MHP) Öcalanla görüşün zəruri olduğunu bildirib, “Yeniden Refah”, Demokratik Sol Partiyası və “HÜDA Partiyası nümayəndələri isə İmralıya səfərə qarşı çıxıblar.
Lakin CHP bu məsələnin hələ rəsmi olaraq komissiyanın gündəliyinə daxil etmədiyi üçün müzakirə etməyib. Bəzi CHP komissiya üzvləri İmralıya səfərə qarşı çıxıblar, digərləri isə buna heç bir maneə görmürlər.
AKP Qrupunun Öcalanla görüşməyə o qədər də həvəsli olmadığı məlumdur. Lakin Ərdoğanın qərarı partiya üçün həlledici olacaq.Bu arada, “Cümhur İttifaqı”nın əsas tərəfdaşı və prosesin əsas hərəkətverici qüvvəsi olan MHP-nin 29 oktyabr Respublika Günü münasibətilə Prezident Sarayında keçirilən qəbulda iştirak etməməsi pərdəarxası olaraq fərqli şərh olunur.
Tərəflərdən heç biri yaranmış fikir ayrılığı ilə bağlı suallara hələ cavab verməsə də, bu məsələnin prosesə təsiri diqqət mərkəzindədir.
Müşfiq Abdulla
