Müxalifətdəki fəaliyyəti dövründə heç vaxt lider kimi qəbul edilməyən Əli Kərimlinin diqqəti cəlb etmək üçün çıxartmadığı “oyun” qalmayıb.
Adını nə qoyursa-qoysun, “ənzəli”dən “beşdaş”a qədər bütün uşaq oyunlarına oxşayan bu addımlar onun siyasi reklamında heç bir rol oynamadı. Bir zamanlar təxribatçı mitinqlərdən istifadə etməklə siyasi reklama çalışsa da, nəticə alınmadı və ona qalan küçədəki əndrabadi şəkli, stadionda qışqırmağı oldu. “Oyunları” zamanı ətrafındakı bir qrup adamdan başqa aksiyalarına yığışan olmadı.
İflasın bu mərhələsində manevr etməyə cəhd etdi və bu dəfə sosial şəbəkə manipulyasiyasına başladı. Elə indinin özündə də Əli Kərimli cəmiyyətdən dəstək ala bilmədiyini, insanların çağırışla onun “oyun”larına alət olmadığını və evində oturmaqdan başqa yolunun qalmadığını etiraf edir. Lakin usanmır.
Gündəmdə qalmaq üçün oturub müxtəlif üsullar axtarır. Gah sosial şəbəkələr üzərindən statuslar paylaşıb insanlara “Mən də varam” deyə özünü sırımağa, fikirlərini aşılamağa və yeni oyunlarına tamaşaçı yığmağa çalışır, gah da öz şəninə siyasi “tostlar”la dedirtməklə özünə təsəlli verir.
Bu dəfə özü üçün yeni “ideya” kəşf edib. Hər kəsdən əli üzülən Əli Kərimli indi də xarici mətbuata dadanıb.
Vaxtaşırı xarici ölkələrdə müxtəlif mətbu orqanlara öz yanından müsahibələr hazırlatdırıb göndərir və müxtəlif üsullarla bunların dərcinə nail olur. Sonra da həmin müsahibələri sosial şəbəkələrdə paylaşıb özündən lider obrazı yaratmaq üçün “mirzələri”nə də həmin müsahibələrini bəyənməyi, rəy yazmağı və paylaşmağı tapşırır.
Bir sözlə, Əli Kərimli öz şəninə sifarişlə təriflər yağdırır, özünü siyasi fenomen kimi təqdim etməyə çalışır. Guya onun müsahibə verməsi qeyri-adi əhəmiyyətə malik siyasi hadisəymiş. Məqsəd isə özünü cəmiyyətə “lider” kimi təqdim etməkdir. Yəni 30 ildən çoxdur çağırılmış köhnə bayatılar təzədən oxunur.
Əli Kərimli gündəmdə qalmaq və özündən süni müxalifət lideri düzəltmək üçün siyasi şoular göstərməklə məşğuldur.
Amma Əli Kərimli də, çevrəsindəkilər də bir həqiqəti unudurlar ki, siyasi idarəetmədə süni intellektin tətbiq olunduğu bir vaxtda hansısa qəzetə müsahibə verməyi onun zəkasının uğuru, dühası adlandırmaq gülüş doğura bilər.
Liderlik keyfiyyəti yalnız xalq arasında geniş sosial bazaya və seçici kütləsinə malik siyasətçilərə aid edilir. Əli Kərimlinin isə belə bir potensialı yoxdur.
Onun bütün potensialı 2019-cu il 19 oktyabr mitinqindən sonra Ramiz Mehdiyevin 23 oktyabrda Prezident Adminstrasiyasının rəhbəri postundan çıxarılması ilə bitib.
Süleyman
