Böyük Britaniya Kralı III Çarlz 500 ildən sonra ilk dəfə bir Roma Papası ilə açıq şəkildə dua edən Britaniya monarxı olub.
Paraqraf.com CNN-ə istinadən xəbər verir ki, kral cümə axşamı günü Vatikana etdiyi dövlət səfəri çərçivəsində Papa XIV Leo ilə birlikdə Sikstin kapellasında keçirilən ekumenik mərasimdə iştirak edib.
Mikelancelonun freskaları ilə bəzədilmiş məşhur kapellada keçirilən mərasimə Papa Leo və İngiltərə Kilsəsinin York arxiyepiskopu Stiven Kotrell rəhbərlik edib. Mərasim “yaradılışın qayğısı” mövzusuna həsr olunub – bu, həm Kral Çarlzın ekoloji narahatlıqları, həm də Papa Leonun pontifikatının əsas istiqamətlərindən biridir.
Mərasimdə Sikstin kapellasının xoru ilə yanaşı, Vindzordakı Müqəddəs Georgi və Kral kapellalarının xorları da çıxış edib. Britaniyalı ifaçılar Renessans dövrünün bəstəkarı Tomas Tallisin “If Ye Love Me” (“Əgər məni sevirsənsə”) əsərini səsləndiriblər. Seçim simvolik xarakter daşıyır, çünki Tallis Reformasiya dövründə katolik inancını qoruyaraq fəaliyyətini davam etdirən bəstəkar olub.
Hadisə Reformasiyadan sonra katoliklər və anqlikanlar arasında münasibətlərin dərinləşməsinə işarə edən mühüm addım kimi qiymətləndirilir. Vatikanın “Xristian Birliyinin Təşviqi” departamentindən keşiş Martin Braun bildirib ki, bu səfərin əhəmiyyətini “şişirtmək çətindir” və o, “Britaniya monarxiyası ilə Roma Papalığı arasında yeni bir ekumenik mərhələnin başlanğıcı” kimi dəyərləndirilir.
Paraqraf.com
