Yüksək intellektli və sağlam düşüncəli gənclərin daxili işlər orqanlarında xidmətə və təhsilə cəlb olunması istiqamətində ərazi polis orqanları ilə birlikdə məqsədyönlü fəaliyyət davam etdirilir.
Paraqraf.com “Qafqazinfo”ya istinadən xəbər verir ki, bu məqsədlə Bakı şəhərinin Nəsimi və Səbail rayonlarında yerləşən tam orta məktəblərin şagirdləri Polis Akademiyasında keçirilən “Açıq qapı” tədbirində iştirak ediblər.
Şagirdlər tədris korpusları, kriminalistik təlim şəhərciyi, mühazirə zalları, “İnformasiya təhlükəsizliyi” fakültəsinin ən müasir texniki avadanlıqlarla təchiz olunmuş elmi-tədqiqat laboratoriyası, təlim mərkəzi, qapalı atıcılıq tiri, idman meydançası, auditoriyalar, kursant yeməkxanası və yataqxana ilə tanış olublar.
Qonaqlara Akademiyada yaradılmış təhsil mühiti, qəbul qaydaları, kursantların maddi, sosial təminatları və akademiyada təhsilin üstünlükləri barədə ətraflı məlumatlar verilmiş, onları maraqlandıran suallar cavablandırılıb.
Paraqraf.com
