ABŞ-də Respublikaçılar Partiyasından olan konqresmen Deyv Teylorun (Ohayo ştatı) ofisində, onun əməkdaşının kabinetində üzərində svastika (nasist simvolu, qammalı xaç) təsviri olan ABŞ bayrağı aşkar edilib.
Paraqraf.com xəbər verir ki, bu barədə “Politico” nəşri yazıb.
Materialda ofisin əməkdaşı Ancelo Elianın iştirak etdiyi onlayn-görüşün ekran görüntüsündən danışılır. Bildirilir ki, nasist simvolu olan bayraq məhz bu əməkdaşın kabinetində qeydə alınıb.
Konqresmen Teylor məlumata belə reaksiya verib: “Mənə həmin görüntü barədə məlumat veriblər. Belə görünür, bu son dərəcə mənfur və yersiz simvol mənim ofisimdə, tabeliyimdə olan əməkdaşın yanında qeydə alınıb”.
Teylorun sözlərinə görə, sözügedən təsvir onun ofisində qəbul edilmiş və tabeliyindəki insanların paylaşdığı dəyər və prinsipləri əks etdirmir. O, faktı son dərəcə qətiyyətlə pisləyib.
Konqresmen əlavə edib ki, Kapitoli polisi ilə birgə məsələyə dair araşdırmalara başlayıb.
Paraqraf.com
