Almaniyanın Regensburg Universitetinin alimləri müəyyən ediblər ki, iqlim dəyişikliyi “kraliça arı”ların (ana arı ya da arı bəyi) ömrünə və çoxalma qabiliyyətinə ciddi təsir göstərir.
Paraqraf.com xəbər verir ki, araşdırma bombus arısı (tüylü arı) növünə aid kraliçalar üzərində aparılıb.
2000–2014-cü illəri əhatə edən uzunmüddətli müşahidələr əsasında aparılan tədqiqatın nəticələri “Journal of Animal Ecology” jurnalında dərc olunub.
Qeyd olunur ki, iqlim dəyişikliyinin mənfi təsirləri yalnız temperatur artımı ilə məhdudlaşmır. Mövsümi hava hadisələrinin vaxtı və intensivliyindəki dəyişikliklər də bombus arılarının həyatı üçün mühüm rol oynayır.
Tədqiqatın nəticələrinə görə, kraliça arıların həyatının erkən mərhələsində dəyişkən iqlim şəraitinə məruz qalması onların ömrünü və çoxalma qabiliyyətini əhəmiyyətli dərəcədə azaldır.
Xüsusilə, mülayim qış ayları arıların vaxtından əvvəl oyanmasına və enerji ehtiyatlarını erkən tükətməsinə səbəb olur. Bu isə yaz mövsümündə onların sağ qalmaq və yeni koloniya qurmaq imkanlarını zəiflədir.
Bundan əlavə, mövsümə uyğun olmayan güclü yağışlar da arıların həyatını çətinləşdirir. Yağışlı hava şəraiti polen və nektar toplama prosesini məhdudlaşdırdığı üçün arıların qida tapmaq imkanlarını azaldır.
Tədqiqatın aparıcı müəllifi Dr. Rut Arçer bildirib ki, bombus arıları yalnız yabanı çiçəklərin deyil, həm də kənd təsərrüfatı bitkilərinin tozlanmasında mühüm rol oynayır.
Onun sözlərinə görə, iqlim dəyişikliyinin bu növlərə mənfi təsiri həm ekosistemlər, həm də kənd təsərrüfatı üçün ciddi nəticələr doğura bilər.
Paraqraf.com
