Azərbaycan Prezident Adminstrasiyasının sabiq rəhbəri, AMEA-nin keçmiş prezidenti Ramiz Mehdiyevin həbsi onun şəxsiyyəti və fəaliyyəti ilə bağlı qaranlıq qalan bir sıra şübhəli məqamlara aydınlıq gətirmək imkanı yaradacaq.
Uzun müddət Azərbaycanda adı “5-ci kolon”un lideri kimi çəkilən Ramiz Mehdiyevin bu yöndə törətdiyi əməllər istintaq prosesində üzə çıxa bilər. Müxtəlif ictimai-siyasi dairələrdə, mediada Rusiyanın Azərbaycanda yaratdığı “5-ci kolon”un siyasi təlimatları məhz Ramiz Mehdiyevdən aldığına dair kifayət qədər məlumatlar var.
Dövlət strukturlarında siyasi monopoliya yaratmağa çalışan Ramiz Mehdiyevə “boz kardinal” ləqəbi kimi tanınması da bununla bağlı olub. Dövlət içərisində öz hakimiyyətini qurmaq, səalhiyyətlərindən istifadə edərək klançılıq siyasəti yürütmək Ramiz Mehdiyevin rəhbərlik etdiyi “5-ci kolon”un əsas fəaliyyət prinsipi olub.
Ramiz Mehdiyevin həbsi Azərbaycan dövlətçiliyi üçün bu təhlükənin hələ qalmasından xəbər verir. Belə qüvvələr yenidən fəallaşmaq üçün siyasi şəraitin yetişməsini gözləyir. Administrasiyanın sabiq rəhbərinin əli yalnız dövlət strukturlarına deyil, müxalifətə də uzanıb.
Üzdə özünü hakimiyyətə sadiq göstərən Mehdiyev əslində radikal müxalifətə siyasi himayədarlıq edib. 2013-cü ildə müxalifət partiyalarının birləşdiyi Milli Şuranın Ramiz Mehdiyevin xeyir-duası ilə yaradıldığı yaxşı məlumdur.
Bunu isbatlayan faktlardan biri 2013-cü ildə keçirilmiş prezident seçkilərində Rusiya vətəndaşı olan Rüstəm İbrahimbəyovun Milli Şuranın vahid namizədi kimi irəli sürülməsi idi. “5-ci kolon”un müxalifət cinahı olan Milli Şuranın etiraz aksiyalarını Ramiz Mehdiyevin siyasi direktivləri ilə təşkil etdiyi danılmaz gerçəklikdir.
Sirr deyil ki, Milli Şura adlı bu qurum həmişə Əli Kərimlinin diqtəsi ilə hərəkət edib, bəyanatdan tutmuş icazəsiz aksiyaya qədər bütün qərarlar Əli Kərimlinin tələbi ilə verilib. 2019-cu il oktyabrın 19-da da AXCP sədri Əli Kərimlinin canfəşanlığı ilə Milli Şuranın Bakı şəhərin mərkəzində, Rəşid Behbudov prospektində kütləvi iğtişaş törədərək yürüş-mitinq keçirmək cəhdi çoxlarının xatirindədir.
Hüquq-mühafizə orqanlarının ciddi müdaxiləsindən sonra icazəsiz aksiyanın qarşısı alınmışdı. Bu hadisədən 3 gün sonra-oktyabrın 22-də Ramiz Mehdiyevin Prezident Adminstrasiyasının rəhbəri vəzifəsindən xaric edilməsi qeyd edilən iğtişaşların arxasında Ramiz Mehdiyev amilinin dayandığını göstərir.
Ancaq o, bu prosesdə tək deyildi və məsələyə bütövlükdə “5-ci kolon”un siyasi sistemi zorakılıqla, xarici qüvvələrin maraqlarına uyğun dəyişmək niyyəti kimi baxmaq lazımdır.
Yəni “boz kardinal” həm vəzifə səlahiyyətlərindən, paralel olaraq müxalifətdə ona xidmət göstərən radikalların təxribatlarından istifadə edərək hakimiyyəti ələ keçirməyə çalışıb. Ramiz Mehdiyevə qarşı irəli sürülən ittihamlar bunu bir daha təsdiq edir.
Müşfiq
Paraqraf.com
