Cəmiyyətin sağlam və davamlı olması üçün ailə ən mühüm təməl daşlarından biridir. Ailənin gücü isə qadın və kişinin üzərinə düşən məsuliyyətlərin düzgün bölüşdürülməsi, qarşılıqlı hörmət və sevgi ilə davranmaları ilə formalaşır. Qadın və kişi bərabərliyi haqqında düşünərkən mən bu bərabərliyi hər sahədə eyni olmaq kimi deyil, hər kəsin öz təbii rolunda dəyərli və əvəzsiz olmasını ifadə edən bir anlayış kimi qəbul edirəm.
Kişi ailənin qoruyucusu, dayağıdır. Onun borcu ailəsini müdafiə etmək, halal zəhməti ilə evinə ruzi gətirməkdir. Hər bir kişi ailəsinin möhkəm sütunu, etibarlı dayağı olmalıdır. Mən uşaqlıq illərimdə atamın əziyyətini, zəhmətini öz gözlərimlə görmüşəm. Soyuqda, istidə çalışar, palçığa batmış çəkmələri və qabar bağlamış əlləri ilə evə qayıdardı. Amma onun üzündə həmişə bir təbəssüm, gözlərində isə ailəsinə olan sonsuz sevgi parıldayardı. Mən onun bu əzmini gördükcə, özümə söz vermişdim – bir gün onun kimi olmaq istəyirəm. Başqasına deyil, öz zəhmətinə arxalanan, alnının tərilə yaşayan bir insan kimi.
Qadın isə ailənin dirəyi, ruhudur. Əgər kişi çöl işlərini görürsə, qadın evin istiliyini, birliyini qoruyur. Ana övladına sevgi və tərbiyə verir, həyat yoldaşına dəstək olur, ailədə sülh və harmoniya yaradır. Mənim anam da hər zaman atama dayaq olub. Atam işdən yorğun qayıdanda, anam onu qarşılayar, yeməyini hazırlayar, evdə sevgi dolu, sakit bir mühit yaradardı. Biz süfrə arxasında oturanda bütün yorğunluq unudulardı. Valideynlərimin fədakarlığı mənə ailə həyatının əsl mənasını – sevgi, anlayış və qarşılıqlı hörməti öyrədib.
Məncə, qadın və kişi arasında bərabərlik yalnız o zaman mümkündür ki, hər iki tərəf bir-birinin dəyərini və əhəmiyyətini dərk edə bilsin. Həyatlarını birləşdirən qadın və kişi yalnız bir məsuliyyəti deyil, ikiqat məsuliyyəti bölüşürlər. Onlar artıq “mən” yox, “biz” olurlar. Hər addımda bir-birini düşünməli, qarşılıqlı hörmət və anlayışla yanaşmalıdırlar.
Unutmamalıyıq ki, ailə yalnız iki fərdin birliyi deyil, iki ürəyin birləşdiyi yerdir. Ailədə sevgi və etibar varsa, orada həm bərabərlik, həm də xoşbəxtlik olacaq. Hər bir insan ailəsini sevməli, onu qorumağı bacarmalı, çətin anlarda bir-birinə dayaq olmalıdır. Həyat yoldaşı təkcə sevgi deyil, həm də səbir, anlayış və dəstək deməkdir.
Əgər kişi gücü və zəhməti ilə ailənin dayağıdırsa, qadın sevgisi və mərhəməti ilə o ailənin canıdır. Onlar birlikdə olduqda o ev sadəcə bir yaşayış məkanı deyil, bir yuva, bir vətənə çevrilir. Əsl xoşbəxtlik də elə bu birlikdə – qarşılıqlı hörmət və sevgidə gizlidir.
Elçin Ağasiyev
Paraqraf.com
