Dünya dəyişir. Dünən hələ neft və qazla nəfəs alan bəşəriyyət, bu gün yaşıl enerjiyə sarılır. Buzlaqların əridiyi, hava axınının pozulduğu, quraqlıqların artdığı bir vaxtda təbiət bizə səssiz bir çağırış edir: Davamlılıq uğrunda birgə mübarizə.
Bu çağırışa ilk cavab verənlərdən biri də Azərbaycandır. Qərbdə Xəzərin sahillərindən tutmuş, şərqdə dağlıq Qarabağın təmiz havasına qədər bu torpaq artıq yeni bir enerji – yaşıl enerji ilə nəfəs almağa başlayır. Əgər XX əsr bizim üçün “qara qızılın” – neftin əsri idisə, XXI əsr günəşin, küləyin və suyun əsrinə çevrilmək üzrədir. Və bu dönüş nöqtəsində Azərbaycanın adı ön sıralarda yer alır.
Prezident İlham Əliyevin rəhbərliyi ilə qəbul edilən “Yaşıl enerji zonaları” konsepsiyası Azərbaycanın bu sahədəki iddialarını təkcə sözlə yox, əməli addımlarla sübut edir. Qarabağ və Şərqi Zəngəzurun “yaşıl zona” elan edilməsi sadəcə energetik deyil, ekoloji və strateji baxımdan da mühüm bir mesajdır. Bu, dağıntıdan doğan dirçəlişin simvoludur – təbiətə hörmətlə, gələcəyə inamla atılan addım.
Amma məsələ təkcə elektrik istehsalı deyil. Bu dəyişiklik həyat tərzimizə, düşüncə modelimizə sirayət edir. Elektriklə işləyən nəqliyyat vasitələri, ekoloji təmiz istehsal, karbon emissiyasız sənaye – bunlar artıq bizim gələcəyimiz yox, bu günümüzün reallığına çevrilir.
İqlim dəyişikliyi artıq sabahın təhlükəsi deyil. Bu, bu günün acı həqiqətidir. Su ehtiyatlarının azalması, hava şəraitindəki qeyri-sabitlik və torpaqların deqradasiyası Azərbaycan kimi iqlimi zərif balans üzərində qurulmuş ölkələr üçün daha da təhlükəlidir. Belə bir vaxtda yaşıl enerji siyasəti sadəcə seçim deyil, zərurətdir.
Bu yolda təbiətin özü bizim tərəfdaşımızdır. Abşeronun sərt küləkləri, Naxçıvanın alovlu günəşi, Qarabağın təmiz havası — bunlar təkcə coğrafi xüsusiyyət deyil, həm də enerji sərvətləridir. Azərbaycanın müxtəlif guşələrində tikilən Külək parkları, Günəş stansiyaları, hidroenerji qurğuları artıq xəyal yox, reallıqdır. Bu reallıq isə xarici investorların da diqqətindən yayınmır. Çünki Azərbaycanın enerji bazarı artıq yalnız neft və qazın çıxarıldığı yer deyil — yaradılan, bərpa olunan enerjinin mərkəzinə çevrilir.
Yaşıl enerji – bu, təkcə texnologiya deyil. Bu, bir fəlsəfədir. Bu, insanı təbiətə qarşı yox, təbiətlə yanaşı yaşamağa çağırır. Enerjini al, amma təbiəti incitmə. İstifadə et, amma məhv etmə. Məhz bu düşüncə sabahın gücünü müəyyən edir. Sabahın gücü – təbiətlə harmoniyada olan enerji modelidir.
Azərbaycanın yaşıl enerji strategiyası – bu, təkcə hökumət sənədi deyil. Bu, bir xalqın gələcək nəsillərə verdiyi söz, torpağa, suya, havaya göstərdiyi qayğıdır. Bu gün verilən qərarlar sabahın nəfəsini təmizləyəcək, balalarımızın ayaq basdığı torpağı qoruyacaq.
Və nəhayət – yaşıl enerji gələcəkdir, amma onun təməli bu gün atılır.
M.Mehdiyeva
Paraqraf.com
