Qlobal miqyasda geosiyasi gərginliklərin artdığı, yeni münaqişə ocaqlarının yarandığı bir dövrdə dövlətlər təhlükəsizlik məsələlərinə daha ciddi yanaşmağa başlayıblar. Xüsusilə Cənubi Qafqaz kimi strateji əhəmiyyətə malik bölgədə regional əməkdaşlıq və hərbi koordinasiya zərurətə çevrilib. Bu fonda Türkiyə, Azərbaycan və Gürcüstan müdafiə nazirlərinin Ankarada baş tutan üçtərəfli görüşü diqqət mərkəzindədir.
Mövzu ilə bağlı siyasi şərhçi, siyasi elmlər üzrə fəlsəfə doktoru Üzeyir Mustafayev Paraqraf.com-a açıqlamasında bildirib ki, dünyada aktiv münaqişələrin genişlənməsi və yeni münaqişə ocaqlarının yaranması fonunda təhlükəsizliyin təmin olunması hər bir dövlət üçün mütləq zərurətə çevrilib:
“Hazırkı beynəlxalq vəziyyətdə dövlətlər kollektiv və ya fərdi imkanlardan istifadə edərək müdafiə sahəsini gücləndirir, yeni təcrübə və texnologiyalardan yararlanmağa çalışırlar. Bu baxımdan Türkiyə, Azərbaycan və Gürcüstan müdafiə nazirlərinin Ankarada keçirilən görüşü xüsusi əhəmiyyət daşıyır. Müdafiə və təhlükəsizlik sahəsində Azərbaycan və Türkiyə arasında geniş əlaqələr mövcuddur. Yaxın dövrün faktını xatırladaq ki, Türkiyənin dünya bazarında xüsusi çəkiyə malik “Baykar Makina” şirkətinin törəməsi olan “Bayraktar Teknoloji Azərbaycan” MMC Azərbaycanda PUA istehsalını həyata keçirir. İkinci Qarabağ müharibəsində PUA-ların döyüş meydanında fəaliyyəti dünya hərb tarixinə düşmüş hadisədir. Eyni zamanda Azərbaycan və Gürcüstan arasında da əksər sahələrdə qarşılıqlı əməkdaşlıq mövcuddur. İkitərəfli münasibətlər inkişaf edir və sahələr üzrə əməkdaşlıq imkanları genişlənir”.
Siyasi şərhçi qeyd edib ki, müdafiə nazirlərinin Ankara görüşü hər üç dövlət arasında mövcud əlaqələrin daha da dərinləşdiyini və təhlükəsizlik sahəsində yeni imkanların yarandığını göstərir:
“Görüşdə üç dövlət arasında regional təhlükəsizlik, hərbi əməkdaşlıq və birgə təlimlərin keçirilməsi kimi vacib məsələlərin müzakirə olunması gözlənilir. Cənubi Qafqaz kimi mürəkkəb regionda dövlətlərin öz təhlükəsizliklərini təmin etməsi naminə hərbi potensiallarını artırmaları və bu istiqamətdə əməkdaşlığı genişləndirmələri zəruridir. Bu əməkdaşlıqlar üçüncü tərəfi hədəf almır. Azərbaycan, Türkiyə və Gürcüstan öz təhlükəsizliyini təmin etməkdə maraqlıdır. Bu gücləndirmə siyasəti regional sülhə və sabitliyə xidmət edir”.
Kəmalə Vəliyeva
Paraqraf.com
